12 Outubru: Dili Rejista hikas Positivu Foun Covid-19 Na’in Haat Featured

By Saturnina da Costa Outubru 12, 2021 329
Vasina Covid-19. Foto:Dok. Vasina Covid-19. Foto:Dok.

DILI: Sala Situasaun Sentru Integradu Jestaun Krize (SIJK) ohin (12/10) relata, ekipa konjunta saúde rejista hikas kazu positivu foun Covid-19 iha Kapital Dili na’in haat (4).

Enkuantu, iha loron 11 fulan-Outubru, Kapital Dili la rejista positivu Covid-19.

Tuir dadus, husi SIJK positivu foun ne’ebé relata ohin iha na’in neen (6), aleinde, iha Dili iha kazu haat, iha Munisipiu Bobonaro mós rejista kazu rua (2).

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun reduz, komparaa ho kazu rekuperadu nafatin aumenta.

“Ema ne’ebé halo tratamentu óspitalizadu iha Izolamentu reduz kompara ho loron horseik (11/10), nune’e dadus ne’ebé iha, hatudu munisipiu lima (5) laiha ona kazu ativu, enkuantu Munisipiu lima (5) seluk sei iha kazu esporádiku,”dehan nia iha komunikadu ne’ebé Online INDEPENDENTE asesu, tersa ne’e.

Nune’e, iha Munisipiu Dili, Baukau no Rejiaun Administrativu Espesial Oekuse Ambeno (RAEOA) mak sei iha kazu cluster.

Entretantu, populasaun elejivel iha Kapital Dili ne’ebé simu ona vasina doze kompletu hamutuk pursentu 70 (70%).

Rui esplika, husi totál kazu detetadu foun ohin, kazu haat (4) ka 66,6% mak hatudu sintomas no kazu ida (1) ka 17% simu ona vasina doze kompletu.

Ho nune’e, SIJK mós rejista pasiente ne’ebé rekupera husi moras Covid-19 iha na’in 52 no kazu ativu ne’ebé iha Izolamentu hamutuk na’in 162.

Totál komulativu kazu konfirmadu sura husi loron 21 fulan-Marsu tinan 2020 to’o loron 12 fulan-Outubru tinan 2021 hamutuk 19.681.

Entretantu, husi horiseik (11/10) mai ohin teste ne'ebé Laboratóriu Nasionál Saúde halo iha Dili hamutuk 122, kompostu husi, Random Screening na’in 40, Viajen internasional na’in 14 no follow up iha kuarentena na’in 69.

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 192.

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 16, kompostu husi kazu grave na’in tolu (4), kazu moderadu na’in neen (6) no kazu leve na’in hitu (7).

Rate this item
(0 votes)

Independente Digital TV