Ministériu Joventude Desportu, Arte no Kultura (MJDAK), Nelyo Isaac Sarmento hatete, hanesan privileizu ida tamba ohin bele halo abertura ba jogu liga futeból Timor-Leste primeira divizaun iha  estádiu munisipál  Manatuto.

“Ida ne’e previleziu ida bele halo abertura ba liga futebol Timor-Leste primeira divizaun iha estádiu munisipál Manatuto, ida ne’e primeira vez ba Manatuto, mesmu estadiu ne’e seidauk inaugura, tanba entermus de infraestrutura estadiu nian iha buat balun ne’ebe seidauk kompleta, presiza atu kompleta,” Dehan Ministru Nelyo, iha abertura LFTL, iha estadiu Manatuto, Sabadu (24/05).

Tanba ne’e, ba Autoridade Regulador Futebol Timor-Leste inklui liga futeból katak governu nia responsabilidade mak fo apoiu masimu liu husi finansiamentu no infraestrutura ne’ebe bele realiza jogu.

“Ohin ba oin iha kampu ida ne’e sei akontese jogus barak tan, iha liga primeira divizaun, no mos ba futuru atu dezenvolve futeból, ita hakarak la’o ba munisipiu hotu, ida ne’e politika  ne’ebe ita hanoin atu lori futeból ba manusipiu, mesmu iha munisipiu balun nia kondisaun infraestrutura seidauk kompleta,” Nia informa.

Maibé, komprimisiu governu nian atu kontinua apoiu dezenvolvimentu futeból ba munisipiu hotu inklui suporta finansiamentu no infraetrutura sira.

“Ha’u husu ba klubu hotu husi primeira divizaun to’o segunda divizaun, atu kompri regras no regulamentu ne’ebe Federasaun futebol Timor-Leste estabelese,” Nia informa.

Ministru Nelyo subliña,  kumpri regras mak xave atu lori dezenvolvimentu futeból ba oin, kria responsabilidade iha jogu, mak  sai ezemplu ba futuru jogadór sira-ne’ebe sei mai.

“Nune’e ho prezensa ita hotu iha ne’e no mos prezensa treinador ekipa selesaun nasional iha ne’e hetan apresiasaun nu’udar oprtunidade atu identifika talentu foin-sae ba selesaun nasionál hodi kompete iha eventu internasional sira,” Tenik nia

Iha fatin hanesan, Prezidente Liga Futeból Timor-Leste (LFTL), Ipolito Soares, orgullu ba realizasaun abertura primeira divizaun iha Manatuto.

“Ha’u hato’o agradese ba Prezidente Autoridade Manatuto, ne’ebe oferese estádiu munisipal Manatuto  ba eventu importante ida ne’e,” Nia dehan.

Nia mos hato’o agradese ba parte  governu liu-liu Ministériu Juventude, Desportu Arte no Kultura no  Federasaun Futebol  Timor-Leste ne’ebé ajuda fundus hodi realiza jogu liga futebol Timor-Leste ba époka 2025.

Nune’e mos Prezidente Autoridade Munisipiu Manatutu (PAM), Luis Inacio Fernandes, hato’o agradese ba governu liu-liu orgaun FFTL no LFTL ne’ebe hili Manatutu sai fatin ba abertura liga LFTL.

“Ha’u agradese ba FFTL, governu no liga LFTL, bele hili Manatuto hodi halo abertura ba jogu liga ni’an no ita hatene katak kampu ida ne’e seidauk inaugural, maibe nesesidade, entaun ita utiliza dadaun ona, depois atu inaugura ou la’e, ne’e govenu mak sei organiza fila-fali, importante hahoris fali futebol,” Nia dehan.

Nia mos enkoraja futebolista sira atu hamutuk lori futebol Timor-Leste sai di’ak liu tan hodi hamorin Timor-Leste nia naran iha eventu internsionál sira.

“Ha’u hanoin depois de liga ida ne’e lao iha Manatuto bele ona iha vontade husi ami nia populasaun  no maluk sira atu haree oinsa, Manatuto mos bele iha klubu profisional atu kompete iha liga sira tuir mai,” Nia hakotu.

 Estádiu Manatuto sei inaugura iha juñu

Purtantu, Ministeriu Juvnetude, Desportu, Arte no Kultura, Nelyo Isaac Sarmento afirma, inaugurasaun ba estádiu munisipál Manatuto iha fulan juñu nia laran

“Estádiu ne’e ita sei inaugura iha fulan oin, tanba intermus infraestrutura iha estádiu ne’e iha buat balun ne’ebe seidauk kompleta, tanba ne’e presiza kompleta tan,” Informa Ministru, Nelyo Isaac Sarmento.

Nia subliña, estádiu ida ne’e empreza finaliza ona, maibe iha buat balun seidauk finalize, tanba ne’e presiza finaliza atu kompleta 100 porsentu.

Purtantu, estádiu Manatuto hahu nia konstrusaun iha 2015, ne’ebe kaer husi kompañia Obai unipasoal Lda, ho numeru kontratu ICB/0128/SEJD-2014, ho total orsamentu $2.363.976,44, maibé la konsege finaliza tuir kontratu.

Nune’e, iha 2022 governu aumenta orsamentu adisional hamutuk $184.741,35 ba kontratu fulan ualu ne’ebe hahu husi fevereiru to’o setembru 2022.

Nune’e, ho total orsamentu ne’ebe gasta ba estádiu munisipal Manatuto hahu husi kontratu kontratu primeiru no aumentu adisional hamutuk orsamentu $2.547.717,79

Iha tinan 2024, governu liu husi MJDAK fo fali komfiansa ba kompañia Viqzum unipesoal lda hodi troka fali kompañia Obai Unipesoal Lda hodi kontinua obra estadiu Manatuto to’o remata.

Nune’e Tuir kontratu foun ne’ebe governu halo ho kompañia ho osan restu ne’ebe iha hamutuk ho adisional hamutuk $600.000 mak atribui ba kompañia hodi kontinua obra refre.