24 Outubru: Positivu Foun iha Na'in Haat, Mate Ida Featured

By Saturnina da Costa Outubru 24, 2021 224
Vasina Covid-19. Foto:Google. Vasina Covid-19. Foto:Google.
  • DILI: Sentru Integradu Jestaun Krize (SIJK) ohin (24/10) relata, ekipa konjunta saúde rejista tan kazu positivu foun Covid-19 iha na’in haat (4) no mate na’in ida (1).

Kordenador Forsa Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, hatete, númeru kazu detetadu foun nafatin reduz ka taxa pozitividade iha 2,0% no total kazu rekuperadu barak-liu kazu detetatu foun.

Aleinde, ema ne’ebé hala’o tratamentu ospitalizadu nafatin reduzidu. Nune’e, iha munisipiu 6 la iha ona kazu ativu no munisipiu 6 seluk ho RAEOA sei iha kazu esporádiku.

Kobertura vasina kompletu (doze 2) iha nivel nasional foin atinji 46%.

“Husi kazu detetadu ne’e iha Dili na’in 3 no Vikeke na’in ida, sira ne’e hotu hatudu sintomas,”dehan nia iha komunikadu ne’ebé Online INDEPENDENTE asesu, domingo ne’e.

Enkuantu, iha kazu ida mak simu ona vasina doze dahuluk.

SIJK rejista mós kazu rekuperadu iha na’in 9 no kazu ativu ne’ebé iha hela Izolamentu hamutuk na’in 63.

Totál komulativu kazu konfirmadu sura husi loron 21 fulan-Marsu tinan 2020 to’o loron 24 fulan-Outubru tinan 2021 hamutuk na’in 19.770.

Entretantu, iha sidadaun feto ida ho idade 49, ne’ebé mate ho Covid-19 hetan ona vasina kompletu, diagnóstikadu sindroma insufisiénsia respiratoria aguda (SIRA) iha loron 23 fulan-Outubru 2021, tanba Covid-19.

Pasiente sofre mós moras rins króniku, no hala’o hela emodiálize. Iha loron ne’e kedas hala’o tratamento iha Lahane. Iha sabado kalan tuku 00.30 pasiente hakotu-iis tanba parajen respiratória.

“Familia kolabora ho ekipa saúde, hodi hala’o funeral tuir protokolu ne’ebé adopta iha Timor-Leste,’tenik nia.

Ho nune’e, tuir dadus husi SIJK total ema ne’ebé mate ho Covid-19 iha Timor-Leste hamutuk na’in 121.

Rate this item
(0 votes)

Independente Digital TV