22 Agosto: Ema Na'in Rua Mate ho Covid-19, Kazu Foun 235

By Agostu 22, 2021 427
Coveiru sira ne'ebe prepara hiit mate iha Ospital Lahane. Foto:Independente. Coveiru sira ne'ebe prepara hiit mate iha Ospital Lahane. Foto:Independente.

DILI: Sala Situasaun Sentru Integradu Jestaun Krize (SIJK) ohin (21/08), relata ekipa konjunta saúde rezista tan sidadaun na’in rua mate iha Sala Izolamentu Vera Crus, nune’e kazu foun Covid-19 hamutuk 235.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, sidadaun Timor-oan na’in rua ne’ebé mate, kompostu husi  mane na’in ida ho feto ida.

“Mane ida ho dade tinan 76, hela iha Dili, iha loron 21 fulan-Agostus 2021, diagnóstikadu ho sindroma insufisiénsia respiratória aguda (SIRA) tan bá COVID-19. Iha fatin isolamentu Lahane, hala’o tratamentu tuir protokolu ne’ebé iha, maibé matebian iis-kotu horikalan (21/08)iha oras 19:00, tanba paragem respiratória no falénsia orgaun lubuk-ida (multiple organ failure). Resultadu PCR hafoin iis-kutu hatudu CT 23. Familia kordena hela ho ekipa saúde atu hala’o funeral tuir protokolu ne’ebé adopta iha Timor-Leste,”dehan nia iha komunikadu, domingo ne’e.

Aleinde, feto ida ho idade tinan 61 hela iha Oecusse, iha loron 18 fulan-Agostu 2021, diagnótikadu iha Óspital Referénsia Oecusse ho sindroma insufisiénsia respiratória aguda (SIRA) tanba Covid-19 (PCR pozitivu ho CT 27,9). Matebian sofre mós Hipertensaun arterial ho diabete. Iha fatin isolamentu Ospitál Fuan nian iha Oecusse, hala’o tratamentu tuir protokolu ne’ebé iha, maibé matebian i’is-kotu ohin (22/08) dader 00:55 tan bá paragem respiratória no falénsia orgaun lubuk-ida (multiple organ failure). Familia kordena hela ho ekipa saúde atu hala’o funeral tuir protokolu ne’ebé adopta iha Timor-Leste.

Enkuantu, kazu foun ne’ebé relata ohin, iha Dili 183, Manufahi 13,  Bobonaro 1, Ainaro 5, Baucau 2, Covalima 31 no Manufahi 13.

Kazu detetadu foun ohin, iha na’in 101 ka 43,0% mak sintomátiku.

Nune’e, kazu detetadu foun ohin, iha 69 (29,3%) mak hetan ona vasina doze kompletu no 41 (17,4%) foin hetan doze dahuluk.

Ho nune’e, pasiente rekuperadu loron ohin hamutuk 57 no kazu ativu hamutuk 3.268.

Totál Komulativu kazu konfirmadu sura husi loron 21 fulan-Marsu tinan 2020 to’o loron 22 fulan-Agostus tinan 2021 hamutuk 14.216.

Totál komulativu óbitu iha Timor-Leste hamutuk na’in 48.

Entretantu, husi horiseik (21/08) mai ohin teste PCR ne'ebé Laboratóriu Nasionál Saúde halo hamutuk 431 kompostu husi, vijilansia sentinela na’in 22, contact tracing 210, random screening 26, viájen sai husi serka sanitária husi Dili 150, viájen internasionál 16 no follow up iha kuarentena na’in  8.

Aleinde, teste PCR ne’ebé halo horiseik (21/08) Munisipiu sira seluk, RAEOA no HNGV hamutuk 488 no Izolamentu Vera Cruz ohin halo tratamentu ba kazu detetadu hamutuk na'in 65.

Tanba ne’e, SIJK nafatin pela ba populasaun sira nafatin regra prevensaun no ijiéne individuál ne’ebé Governu hatuur ona, uza maskara, fase liman ho sabaun ka uza dezinfekta ruma, evita kose liman ba matan, inus no ibun no mós labele halibur malu barak.

 

Asistente Editor: Saturnina da Costa

Rate this item
(0 votes)
Last modified on Tersa, 31 Agostu 2021 12:00
Saturnina da Costa

Jornalista Jornal Independente

https://independente.tl

Independente Digital TV