Tuir Koordenadór Gabinete Kurikulum Unidade Nasional, João Maupelo hateten husi númeru total estudante ne’e kompostu husi estudante ensinu báziku na’in 26.747, ensino sekundáriu jerál hamutuk 25.012, ensinu tekníku vokasionál hamutuk na’in 3.717, no mós programa nasionál ekivalénsia ensino báziku  hamutuk 427.

“Total estudante ne’ebé sei partisipa ezame nasional hamutuk na’in 55.902,”dehan nia ba Jornalista sira iha Salaun Ian Martin, INFORDEPE, Balide Dili, segunda (22/09/25).

Kona ba matéria ezame nasional nian, Koordenadór João, hateten dadauk ne’e Ministeriu Edukasaun liu husi Gabinete Kurikulum Unidade Nasional kontinua halo impresaun ba matéria ezame nasional nian.

 “Progresu imprensaun agora la’o dadauk, ita imprime ona matéria ensino báziku nian besik remata ona, hafoin tama kedas ba verifikasaun. Iha prosesu tolu, primeiru ita halo verifikasaun ba pontus ne’e los ona ita hatama ba layout, depois sira halo edit final layout, hafoin tama ba imprime. Agora tama ona ba impresaun ba pontus ezame ensino báziku nian, ne’ebé la’o besik hotu ona, no emprime hotu ita sei ba halo verifikasaun, verifikasaun hotu, ita sei  ba halo verifikasaun koloka tuir disiplina ho eskola ida idak,”tenik nia.

Iha loron 1 fulan-outubru Ministeriu Edukasaun halo pakotementu kada eskola, hafoin iha loron 17 fulan-Outbru distribui ba eskola sira.