“Númeru kazu detetadu foun 44 ho taxa pozitividade 3,3 no kazu ativu  iha sala izolamentu hamutuk na’in 1.260,”dehan nia iha komunikadu neebé Online INDEPENDENTE, asesu domingo nee.

Nunee, munisípiu ida la iha ona kazu ativu, enkuantu, munisípiu 10 ho RAEOA sei iha kazu esporádiku no Kapitál Díli ho transmisaun komunitária.

Ho nunee, total komulativu kazu konfirmadu sura husi loron 21 fulan-marsu 2020 too 20 fevereiru 2022 hamutuk 22.358 no óbitu hamutuk 125.

Entretantu, iha oras 24 nia laran, teste PCR neebé Laboratóriu Nasionál Saúde halo iha Dili hamutuk 101, kompostu husi, rastreiu ba kontaktu na’in 3, rastreiu aleatóriu 16 no viájen internasionál hamutuk 82.

Aleinde, teste PCR ne’ebé halo iha 19 fevereiru iha munisipiu sira seluk, RAEOA no HNGV hamutuk 241.

Haree ba númeru kazu neebé kada loron aumenta, Ministeriu Saúde nafatin apela ba populasaun iha Díli laran no mós iha munisípiu sira seluk, atu aprezenta-an iha fasilidade saúde ne’ebé besik, bainhira sente isin-manas, kakorok moras, inus-ben, ka mear, hodi bele hetan atendimentu husi profisionál saúde sira.

Nunee mós ba populasaun sira iha Timor-Leste laran tomak, maski simu ona vasina, favor respeita nafatin regra ba prevensaun.

Asistente Editor: Saturnina da Costa