Enkuantu, kareta hitu nee, sosa ho montante osan dolar ameikanu hamutuk $949,888.00.
“Kareta sira nee sosa husi kompañia Cilias Unipessoal. LDA, mai Sekretaria Estadu Protesaun Sivil (SEPS), atu ajuda servisu pessoal bombeiros iha terrenu, liu liu atu halo atendimentu ba kestaun insendiu sira no kestaun emerjensia sira seluk,” dehan Sekretariu Estadu Protesaun Sivil (SEPS), Joaquim José Gusmão dos Reis Martins, ba jornalista sira iha edifisiu SEPS, Kaikoli, segunda nee.
Nia hatutan, orsamentu ba akizasaun karreta hitu ne’e, mai husi OJE 2021 nian. Nunee, SEPS loke konkursu, kompañia Cilias Unipessoal. LDA, mak sai hanesan manan na’in ba konkursu refere, hodi hatama kareta sira nee mai no SEPS intrega ba Diresaun Nasional Bombeirus.
Nia akresenta, korpu servisu bombeiru sira presiza tebes viaturas sira nee hodi halo atendimentu servisu emerjensia sira komunidade.
“Karreta sira ne’e ita sei estasiona iha ne’e, tempu badak ita sei distribui ba munisipiu sira neebé presiza karreta hodi kombate insendiu, hanesan iha Suai, ne’e presiza karreta kombate insendiu no tempu badak ita sei destribui ba ne’ebá,”nia haktuir.
SEPS mós rekoñese, viaturas sei sai difikudade bo’ot ba iha servisu bombeiros nia atu halo atendimentu ba servisu emerjensia sira, enkuantu, hanesan iha Dili karreta bo’ot ba kombate insediu nee iha rua deit.
Tanba ne’e, sei halo tan akizasaun ba karreta bombeirus sira hodi fasilita pesoal servisu halo atendimentu no servisu ho diak.
“Tanba ita haree viaturas bombeiros ba kombate insendiu nian ne’e balun tinan-sanulu (10) no balun, no tinan 20 ona ita presiza halo modernisaun ba ekipamentu sira ne’e, mak iha OJE 2021 ita hahu halo akizasaun ona no ba OJE 2022, ita sei kontinua halo akizasaun ba karrreta kombate insendiu 16 ho ida ne’e bele kompleta ona, servisu bombeiros sira nia iha munisipiu sira,” afirma nia.
Nia reforsa, kona-ba rekursu umanu, SEPS kontinua fó formasaun kapasitasaun ba pessoal servisu bombeiros sira, tanba ida ne’e importante.
“Ita nian korpu bombeiros ne’e seidauk sufisiente, korpu bombeirus minimu, neebé iha na'in 32 iha kada korpu, maibé to’o agora dadaun ita seidauk kompleta hotu, foin dadaun iha OJE 2021 ita halo rekrutamentu ba korpu bombeiros ba iha munisipiu tolu maka hanesan, Ermera, Manatutu no Likisá. Maibé seidauk sufisiente, no sei kontinua halo aumentu no ita mós sei kontinua aposta ba kualidade liu husi fó formasaun sira,”dehan nia.
Iha fatin hanesan, Diretór kompañia Cilias Unipessoal LDA, Matias Araujo Duarte informa, nia hetan fiar husi SEPS ba halo akizasaun ba karreta kombate insendiu hamutuk hitu.
“Karreta sira ne’e nia hola husi indonézia ho nia Osan Montante $949,888.00,” Afirma nia
Enkuantu, kareta sira neebé sosa hodi kombate insendiu mak hanesan, kareta neebé uza ba rega ahi nian neebé hanaran, auto komandu vehicle iha tolu, karreta be’e tanke ida no karreta ki’ik tolu.
Asistente Editor: Saturnina da Costa
