Sexta, 24 Setembru 2021 | Login
Estudante sira. Foto: Dok/Independente. Estudante sira. Foto: Dok/Independente.

19 Jullu, MEJD Reativa Ensinu Prezensial Featured

DILI: Ministru Edukasaun Juventudi no Desportu, Armindo Maia informa, semana oin loron (19/07) tinan ne’e, reativa hikas aktividade eskola prezensial iha Kapital Dili.

Tanba ne’e, MEJD hamutuk ho Diresaun Edukasaun Munisipiu Dili halo ona reuniaun hodi deside data fiksu hodi reativa eskola fila fali eskola sira.

“Ami halo reuniaun ona ho ita nia edukasaun munisipiu dili kona-bá reativa eskola, tanba ne’e ita hakarak pro-ativu liu ba iha eskola sira atu nune’e bele prepara ba semana oin iha loron 19 fulan jullu ita bele reativa ona aktividade ensinu prossesu aprendijazem,”dehan nia ba jornalista sira iha sala VIP-MEJD Vila-Verde, kinta horseik (08/07).

Enkuantu, tuir dadus total eskola sira iha Kapital Dili hamutuk 180, husi númeru ne’e 50 resin mak prepara ona kondisaun eskola nian ho pursentu 70 (70%).

tanba ne’e, MEJD kontinua ejize ba eskola sira atu prepara kondisaun eskola nian, nune’e, bele reativa ensinu aprendijazem  iha semana oin mai.

Nune’e, MEJD nafatin konsolida dadus atu nune’e eskola sira ne’ebé seidauk prepara kondisaun, sei suspende nafatin.

Entretantu, Diretor Edukasaun Munisipiu Dili Duarte Braganza hatete, antes atu reativa hikas ensinu aprendijazem, ambiente eskola nian tenki mós, inklui professor no estudante hotu tenke simu vasinasaun atu nune’e bele sai ambiente ida ne’ebé seguru no saudável ba estudante no professor sira.

Enkuantu, eskola ne’ebé prepara ona kondisaun mak hanesan ESG Nikolau Lobato, ESG 5 de Maiu, ESG 4 de Setembru no sira seluk tan.

Nune’e, tuir dadus total eskola iha teritoriu TL hahú iha nivel ensinu báziku to’o ensinu sekundaria hamutuk 137, ne’ebé ho total estudante hamutuk 48,647 no professor hamutuk 2,970.

Husi numeru ne’e, total professor ne’ebé simu ona vasina hamutuk 663.

 

Asistente Editor: Saaturnina da Costa

Read 208 times
Rate this item
(0 votes)