Segunda, 25 Outubru 2021 | Login
Teste PCR hatudu rejultadu positivu. Foto:Dok. Teste PCR hatudu rejultadu positivu. Foto:Dok.

18 Setembru: Positivu Foun Tun ba 51, Rekuperado 81

DILI: Sala Situasaun Sentru Integradu Jestaun Krize (SIJK) ohin (18/09) relata, ekipa konjunta saúde rejista kazu positivu foun Covid-19 tun ba 51, kompara ho loron horseik (17/09) iha na’in 87.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu positivu foun iha Dili nafatin rejista as, kompara ho Munisipiu sira seluk.

Husi kazu detetadu 51, iha Dili na’in 25, Ainaro na’in 4, Baukau na’in 4, Bobonaro na’in 5, Lautem na’in 4, Likisa na’in 1, Manufahi na’in 4 no Vikeke na’in 4.

“Husi kazu detetadu ne’e, na’in 31 ka 60,7% mak hatudu sintomas, na’in 9 ka 18% simu ona vasina doze kompletu no na’in 3 ka 6% simu ona vasina doze dahuluk,” dehan nia iha komunikadu ne’ebé Online INDEPENDENTE asesu, sabado ne’e.

Aleinde, SIJK mós rejista pasiente ne’ebé rekupera husi Covid-19 hamutuk na’in 81 no kazu ativu ne’ebé baixa hela iha Izolamentu hamutuk 1.888.

Totál komulativu kazu konfirmadu sura husi loron 21 fulan-Marsu tinan 2020 to’o loron 18 fulan-Setembru tinan 2021 hamutuk 18.994.

Entretantu, husi horseik (17/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 197, kompostu husi, Vijilansia sentinela na’in 24, Contact tracing na’in 8, Random Screening na’in 50, Viajen sai husi serka sanitaria iha Dili na’in 94, Viajen internasional laiha no follow up iha kuarentena na’in 21.

Nune’e, teste PCR ne’ebé Laboratoriu Nasional Saúde halo iha Munisipiu sira seluk, RAEOA no HNGV hamutuk 361. Iha 18 fulan-Setembru Izolamentu Vera Crus, Lahane, HNGV no fatin sira seluk halo tratamentu hospitalizadu ba kazu detetadu hamutuk 63, kompostu husi kazu grave na’in 9, kazu moderadu na’in 38 no kazu leve iha na’in 16.

Read 198 times
Rate this item
(0 votes)

About Author