MS Husu Membru Governu Fó Hanoin ba Komunidade Simu Vasina

By Gregoriu da Costa Setembru 18, 2021 563
Ema ho Defisiensia simu vasina iha salaun ADTL. Foto:INDEPENDENTE. Ema ho Defisiensia simu vasina iha salaun ADTL. Foto:INDEPENDENTE.

DILI: Ministra Saúde, Odete Maria Freitas Belo husu ba Membru Governu hotu, bainhira hala’o kampaña eleisaun prezidensial nian bele fó hanoin ba komunidade sira atu hakbesik-an ba postu saúde hodi simu vasina. 

 “Ami iha ona inkontru ho Primeiru Ministru hodi deside husik Ministru no membru Governu hotu atu fó hanoin ba komunidade, atu bele ba simu vasina liu husi kampaña,”dehan nia iha salaun SAMES, Kampu-Alor, sesta (17/09).

MS garante ho prezensa membru Governu bele motiva no fó konfiansa diak liu tan ba komunidade sira atu bele hakbesik-an  ba simu vasina, tanba vasina importante no efetivu tebes.

Nune’e, MS mós rekoñese iha ema ne’ebé simu ona vasina doze kompletu hetan moras, maibé la moras ne’e latodan.

“Los duni katak ema ida ka rua simu ona vasina kompletu hafoin mate no moras, maibé ida ne’e laos tanba Covid-19 deit, sira iha moras seluk ne’ebé antes ne’e iha ona, ezemplo hanesan sira moras sofre kurasaun, pulmaun no diabetes,”tenik nia.

Tanba ne’e, MS apela nafatin ba komunidade sira atu simu vasina no mós kumpri protokolu saúde nian hodi evita hadaet moras ba ema seluk.

Entretantu, sidadaun elejivel iha teritoriu laran tomak ne’ebé simu ona vasina doze kompletu to’o loron 17 fulan-Setembru tinan 2021 hamutuk pursentu 54,2 no doze dahuluk iha pursentu 32. Nune’e, iha Dili ema ne’ebé simu ona doze kompletu hamutuk pursentu 76,3.

Rate this item
(0 votes)

Independente Digital TV