18 Agosto: Ema Na’in Rua Mate ho Covid-19, Kazu Foun 226

By Saturnina da Costa Agostu 18, 2021 221
Inan isin-rua. Foto:Dok/Independente. Inan isin-rua. Foto:Dok/Independente.

DILI: Sala Situasaun Sentru Integradu Jestaun Krize (SIJK) ohin (18/08), relata ekipa konjunta saúde rezista tan sidadaun na’in rua mate iha Sala Izolamentu Vera Crus, nune’e kazu foun Covid-19 hamutuk 226.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, inan isin rua ne’ebé mate hamutuk ho nia oan iha isin.  

“Inan isin-rua ida ho idade tinan 35, enkamiña husi HNGV, iha loron 8 fulan-Agostus tinan 2021, ho diagnóstiku G6P5A0 (isin-rua dalima, tuur-ahi dala lima, la iha istória abortu), isin-rua semana 24, ho mós diagnostiku bronkopneumonia tanba Covid-19 (Cycle Threshold 17,2), ho sintomas respiratorius. Ohin dader iha oras 10:45 hakotu iis tanba multiple organ failure no oan iha inan nia kanotak mós lasalva,”dehan nia iha komunikadu kuarta ne’e.

Nune’e, familia kordena hela ho ekipa saúde atu hala’o funeral tuir protokolu ne’ebé adopta iha Timor-Leste.

Enkuantu, kazu foun ne’ebé relata ohin, iha Dili 167, Covalima 18, Manufahi 10, Ainaro 3, Baucau 9, Bobonaro 3, Manatuto 1, RAEOA 5 no Vikeke 3.

“Kazu detetadu foun ohin, iha na’in 85 ka 37,6% mak sintomátiku. Iha idade tinan 20 mai kraik na’in 38 (24,2%), idade entre 12-59 iha na’in 179 no idade 60 ba leten na’in 9

Ho nune’e, pasiente rekuperadu loron ohin hamutuk 63 no kazu ativu hamutuk 2.507.

Totál Komulativu kazu konfirmadu sura husi loron 21 fulan-Marsu tinan 2020 to’o loron 18 fulan-Agostus tinan 2021 hamutuk 13.155.

Totál komulativu óbitu iha Timor-Leste hamutuk na’in 40.

Entretantu, husi horiseik (17/08) mai ohin teste PCR ne'ebé Laboratóriu Nasionál Saúde halo hamutuk 756 kompostu husi, vijilansia sentinela na’in 26, contact tracing 370, random screening 5, viájen sai husi serka sanitária husi Dili 215, viájen internasionál 30 no follow up iha kuarentena na’in  91.

Aliende, teste PCR ne’ebé halo horiseik (17/08) Munisipiu sira seluk, RAEOA no HNGV hamutuk 222 no Izolamentu Vera Cruz ohin halo tratamentu ba kazu detetadu hamutuk na'in 59.

Tanba ne’e, SIJK nafatin pela ba populasaun sira nafatin regra prevensaun no ijiéne individuál ne’ebé Governu hatuur ona, uza maskara, fase liman ho sabaun ka uza dezinfekta ruma, evita kose liman ba matan, inus no ibun no mós labele halibur malu barak.

 

Asistente Editor: Saturnina da Costa

Rate this item
(0 votes)
Last modified on Tersa, 31 Agostu 2021 12:03

Independente Digital TV