Husi kazu detetadu 4 ne’e, iha Dili na’in 3 no Kovalima na’in ida.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun reduz, komparaa ho kazu rekuperadu nafatin aumenta.

“Ema ne’ebé halo tratamentu óspitalizadu iha Izolamentu mós reduz, nune’e dadus ne’ebé iha, hatudu munisipiu 6 laiha ona kazu ativu, enkuantu Munisipiu 6 ho RAEOA sei iha kazu esporádiku,”dehan nia iha komunikadu ne’ebé Online INDEPENDENTE asesu, sabado horseik.

Entretantu, populasaun elejivel iha Kapital Dili ne’ebé simu ona vasina doze kompletu hamutuk pursentu 70 (70%).

Rui esplika, husi totál kazu detetadu foun ne’e, kazu 3 mak hatudu sintomas no kazu ida simu ona vasina doze kompletu.

Aleinde, SIJK mós rejista kazu rekuperadu iha na’in 9 no kazu ativu ne’ebé iha Izolamentu hela na’in 98.

Totál komulativu kazu konfirmadu sura husi loron 21 fulan-Marsu tinan 2020 to’o loron 16 fulan-Outubru tinan 2021 hamutuk 19.707.

Entretantu, iha oras 24 nia laran, teste ne'ebé Laboratóriu Nasionál Saúde halo iha Dili hamutuk 73, kompostu husi, Vijilansia sentinela na’in 1, Random Screening na’in 21 no follow up iha kuarentena na’in 51.

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 166

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 10, kompostu husi kazu grave na’in 2, kazu moderadu na’in 6 no kazu leve na’in 2.