Kordenador Forsa Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, hatete, kazu foun ne’ebé relata ohin, iha Dili na’in rua no iha Baukau na’in ida.

“Husi kazu detetadu na’in tolu (3) ne’e, hatudu taxa positividade iha pursentu 1,7 (1,7%). Nune’e, iha munisipiu ualu (8) ho RAEOA laiha ona kazu ativu, enkuantu iha munisipiu haat (4) seluk sei iha kazu esporádiku,”dehan nia iha komunikadu ne’ebé Online INDEPENDENTE asesu, kuarta ne’e.

Ho nune’e, iha loron 10 Novembru 2021, SIJK la rejista kazu rekuparadu.

Total komulativu kazu konfirmadu sura husi loron 21 fulan-Marsu tinan 2020 to’o 10 Novembru 2021 hamutuk 19.807.

Entretantu, husi horseik (09/11) mai ohin teste PCR ne’ebé Laboratoriu Nasional Saúde halo iha Dili hamutuk 21, kompostu husi, random screeni g na’in 12 no viajen internasional na’in 9.

Aleinde, teste PCR ne’ebé halo iha munisipiu sira seluk, RAEOA no HNGV hamutuk 147.

Atu hatene surtu nia evolusaun no mós surtu ne’e aumenta ka diminui, indikador ida ne’ebé matenek na’in epidemolójia nian uza mak insidénsia.

Konvensionalmente insidénsia sukat total kazu foun kada loron pur 100 mill abitante no hatudu risku ne’ebé populasaun iha atu hetan da’et moras ida.

Tanba ne’e, SIJK nafatin apela ba populasaun sira atu mantein uza maskara, distansiamentu, no fase lima bebeik ho sabaun no mós uza dezinfetante ruma.