Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo informa, kazu foun ne’ebé relata ohin, iha Dili na’in 36, Baucau 13, Bobonaro 1, Ermera 1, Manufahi 1, Vikeke 1 no RAEOA 3.
“Total kazu detetadu foun ohin proporsaun kazu sintomatiku pursentu 21,4 (21,4%),”dehan nia iha komunikadu, kinta ohin.
Nune’e, pasiente rekuperadu ohin loron hamutuk 65 no kazu ativu iha Sala Izolamentu no Auto-Izolamentu hamutuk 829.
Entretantu, kazu mate ho Covid-19 loron ohin iha sidadaun Timor-oan feto ida, ho idade 70 hela iha Viqueque Vila, diagnostikadu sindroma insufisiénsia respiratória aguda (SIRA), tanbá Covid-19 (Cycle Thresehold N2gene 29,9, E gene 27,4) iha Munisipiu Viqueque.
Iha loron 26 fulan-Juñu, transfere ho aéro-ambulansia ba Vera Cruz, matebian hetan tratamentu ba SIRA, tuir protokolu ne’ebé iha, maibé iha loron 30 fulan-junu, oras 19:25, matebian iis-kotu.
Família kordena ona ho ekipa saúde atu hala’o funeral tuir protokolu ne’ebé adopta iha Timor-Leste.
Enkuantu, tuir dadus ema ne’ebé mate ho Covid-19 hamutuk na’in 24 kompostu husi mane na’in 15 no feto na’in 9.
Husi horiseik (30/06) mai ohin teste PCR ne'ebé Laboratóriu Nasionál Saúde halo iha Dili hamutuk 666 ho detallu hanesan, Contact tracing 19, Random Screening 44, Viájen sai husi serka sanitária husi Dili 566, Viájen internasionál 4 no Follow up iha kuarentena 33.
Totál testes PCR ne’ebé halo horiseik (30/06) iha Munisipiu sira seluk, RAEOA no HNGV hamutuk 428 ho detalle hanesan,
Baucau 111, Ermera 90, Maliana 31, Maubisse 63, RAEOA 36, Suai 24, Vikeke 12 no HNGV 61.
Enkuantu, izolamentu Vera Cruz ohin halo tratamentu ba kazu detetadu hamutuk na'in 10.
Asistente Editor: Saturnina da Costa
