07 Outubru: Kazu Ativu iha 295, Positivu Foun Sa’e ba 20

By Outubru 07, 2021 286
Teste PCR hatudu rejultadu positivu Covid-19. Foto:Dok. Teste PCR hatudu rejultadu positivu Covid-19. Foto:Dok.

DILI: Sala Situasaun Sentru Integradu Jestaun Krize (SIJK) ohin (07/10) relata, kazu ativu ne’ebé iha hela Izolamentu hamutuk na’in 295.

Enkuantu, positivu foun Covid-19 sa’e ba 20 kompara ho horseik (06/10), iha na’in haat (4).

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, númeru kazu detetadu foun aumenta fali kompara ho horiseik, maibé kazu rekuperadu nafatin aumenta.

Husi kazu detetadu 20 ne’e, iha Kapital Dili na’in 15, Bobonaro na’in 1, Baukau na’in 1 no Manufahi na’in 3.

“Husi kazu detetadu ne’e, iha kazu 5 mak hatudu sintomas,  kazu 13 simu ona doze kompletu no kazu 1 simu ona vasina doze dahuluk,”dehan nia iha komunikadu ne’ebé Online INDEPENDENTE asesu, kinta ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 26.

Nune’e, total komulativu kazu konfirmadu sura husi loron 21 fulan-Marsu tinan 2020 to’o loron 07 fulan-Outubru tinan 2021 hamutuk na’in 19.633.

Entretantu, husi horseik (06/10) mai ohin teste PCR ne’ebé Laboratóriu Nasional Saúde halo iha Dili hamutuk na’in 124, kompostu husi, Contact tracing na’in 10, Random screening na’in 30, Viajen internasional na’in 88 no follow up iha kuarentena hamutuk na’in 6.

Enkuantu, teste PCR ne’ebé halo iha munisipiu sira seluk, RAEOA no HNGV hamutuk na’in 240. Kazu detetadu ne’ebé hala’o tratamentu iha Izolamentu Vera Crus, Lahane no HNGV hamutuk na’in 22, kompostu husi kazu grave na’in 5, kazu moderadu na’in 11  no kazu leve na’in 6.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV