06 Outubru: Positivu Foun Covid-19 Tun ba Na’in 4

By Outubru 06, 2021 361
Mediku sira halo dezinfekta ba hotel ne'ebe pasiente Covid-19 sira hela ba. Foto:Dok. Mediku sira halo dezinfekta ba hotel ne'ebe pasiente Covid-19 sira hela ba. Foto:Dok.

DILI: Sala Situasaun Sentru Integradu Jestaun Krize (SIJK) ohin (06/10) relata, ekipa konjunta saúde rejista kazu foun Covid-19 tun ba na’in 4.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, numeru kazu detetadu foun reduz kompara ho loron horseik (05/10) iha kazu 17 no mate ida (1).

Husi kazu detetadu 4 ne’e, iha Kapital Dili na’in 2, Bobonaro na’in 1 no Vikeke  na’in 1.

“Husi kazu detetadu ne’e, iha kazu 2 mak hatudu sintomas no kazu 2 simu ona vasina doze dahuluk,”dehan nia iha komunikadu ne’ebé Online INDEPENDENTE asesu, kuarta ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 143 no kazu ativu ne’ebé baixa hela iha Izolamentu hamutuk na’in 301.

Nune’e, total komulativu kazu konfirmadu sura husi loron 21 fulan-Marsu tinan 2020 to’o loron 06 fulan-Outubru tinan 2021 hamutuk na’in 19.613.

Entretantu, husi horseik (05/10) mai ohin teste PCR ne’ebé Laboratóriu Nasional Saúde halo iha Dili hamutuk na’in 105, kompostu husi Vijilansia sentinela na’in 1, Contact tracing na’in 1, Random screening na’in 32, Viajen internasional na’in 69 no follow up iha kuarentena hamutuk na’in 2.

Enkuantu, teste PCR ne’ebé halo iha munisipiu sira seluk, RAEOA no HNGV hamutuk na’in 299. Kazu detetadu ne’ebé hala’o tratamentu iha Izolamentu Vera Crus, Lahane no HNGV hamutuk na’in 23, kompostu husi kazu grave na’in 5, kazu moderadu na’in 12  no kazu leve na’in 6.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV