Traballadór Burger King Halo Grevé

By Fevereiru 21, 2017 2054
Burger King iha Dili Burger King iha Dili

DIILI: Traballadór lubuk hosi Kompañia Burger King, Segunda (20/02) halo asaun grevé hasoru sira nia patraun tanba la selu sira nia osan over time durante tinan ida servisu.   

Traballadór sira halo asaun protesta hodi ezije Kompañia Burger King tenke selu sira nia osan tuir kontratu ne’ebé mensiona iha lei traballadór nian.

Tuir Traballadór, Valda Fernandes dehan asaun greve ho pás ne’e sira halo, tanba durante ne’e sira husu kompañia atu seluk sira nia osan, maibé too agora kompañia abandona sira nia pedidu.

Sira nia parte haruka ona karta petisaun ba SEFOPE no KSTL atu sai mediadór hodi rezolve problema no defende sira nia direitu

“Ami halo greve, tanba tinan ida ona sira nia selu ami nia osan over time, tanba ne’e ami hato’o ona  karta ba iha SEPFOPE, Parlamentu Nasionál, Kuartél Jerál  PNTL no Kompañia rasik la iha resposta no lori fali karta hodi ameasa  iha ami oin oin,” dehan Valda ba INDEPENDENTE iha  Timor Plaza, horisehik.

Nia dehan, kona-ba karta kontratu ne’e sira simu tinan ida de’it. maibé tinan rua tur mai sira seidauk simu karta kontratu foun.

“Ami hasoru mediasaun iha loron haat kompañia promete ba ami dehan bolu SEPFOPE tenki mai para ita rezolve hotu, maibé realidade SEPFOPE la ba,”tenik nia.

Iha fatin ketak, Divizaun Advokasia KSTL Aurélio Dias da Silva hatete, durante ne’e kompañia viola hela sira nia direitu razaun katak, servisu over time. maibé kompañia la selu ho razaun ne’e mak sira hato’o keixa.

“Bazeia ba problema ne’ebé sira enfrenta ne’e la kondís ona ho lei ne’ebé iha tanba hanesan Timoroan ne’e tenke defende malu ida ne’e importante liu,”dehan nia.

KSTL promete sei koordena ho SEPFOPE no Kompañia Burger King atu selu direitu servisu ne’ebé Timoroan sira halo ona.

Diariu INDEPENDENTE tenta konfirma ho patraun kompañia Burger King rejeita atu fó komentáriu.

Asaun pasifika ne’e halo ho ambiente pás no hetan seguransa hosi Polisia Nasionál Timor-Leste.

Rate this item
(0 votes)

Independente Digital TV