Segunda, 18 Juñu 2018 | Login
Restaurante Restaurante

Hahán La Ijiene, AIFAESA Taka Restaurante 74 Featured

DILI: Autoridade Inspesaun no Fisklizasaun Atividade Ekonomia Sanitária no Alimentár (AIFAESA), provizoriamente taka tan restaurante 74 iha Dili laran, tanba laiha kondisaun ijiene.

Koordenadór AIFAESA, Abílio Oliveira Sereno hateten, estabelesimentu restaurante ne’ebé hala’o iha Dili laran barak tebes, maibé na’in ba restaurante sira ne’e laiha konxiénsia atu haree ba kondisaun ijiene, tanba ne’e afeta tebes ba ema nia saúde bainhira konsumu hahán.

Tanba ne’e, AIFAESA mai direita ba sira nia fatin hodi fó notifikasaun ba sira katak sira tenke taka sira nia atividade provizóriu.

Ami identifika restaurante 74 estabelesimentu ba restaurante sira, nune’e ami notifika ona sira atu taka provizóriu atu hadi'a kondisaun restaurante tuir dekretu lei ijiene”, dehan Abílio, bainhira remata Inspesaun ba restaurante, iha Ai-tarak Laran, Sesta (23/2).

Nia informa, husi levantamentu dadus sira ne’ebé durante AIFAESA foti identifika iha restaurante 64 mak viola lei ijiene no lei lisensamentu. Maibé estabelesimentu sira ne’e mós la’ós de’it kontra lei ijiene ninian, maibé sira barak mós kontra lei lisensamentu.

Karta notifikasaun governu liu husi AIFAESA nia durasaun tempu válidu de'it loron 90 (fulan 3), signifika iha tempu ne'ebé iha kada restaurante sira ne’e tenke hadi'a kondisaun di'ak no hetan lisensamentu kompletu.

Kona-ba sansaun ba restaurante sira ne’ebé viola lei ijiene no viola lei lisensa sei hataan sansaun kioma tuir lei ne’ebé iha. Empreza ida maka viola ona lei ida husi lei de negósiu tenke hetan sansaun multa mínimu rihun $2 boot liu rihun $8.

Tuir dadus husi AIFAESA, restaurante sira ne’ebé AIFAESA identifika hodi taka provizóriu ne’e mak hanesan Yang Reso, Imaculada S da Cruz, Depot Baroka Jaya, Depot Sofya Unipesoal, Surya, Ghaly Nul Zhaydin, Laramau Luzoma, Fatuhada nia mak Laloran, Dr. Kalijaga, Castro Restaurante, Sakinah resto, Belos tempos, Restaurante sabor ita nian, Warung Genot, no Bidau nia mak Warung Genot, Famyli Mitra, Maria Amaral, Kedai Aneka, Mini restaurante moris foun, Rusfaza, Carlival, Maria V. F da Silva.

Tanba ne’e, hanesan koordenadór AIFAESA husu ba empreza sira atu kolabora no kumpre lei ne'ebé iha atu bele fó pasu pozitivu ba timoroan sira ne'ebé konsume ai-han ne'ebé restaurante sira te'in.

Ami husu nafatin atu kolabora nafatin nune’e ita bele fó espasu pozitivu ba ita nia maluk konsumidór sira, lakohi halo tuir nafatin sei taka permanente no hetan sansaun multa liu rihun $2 ba leten” tenik nia. 

Read 204 times
Rate this item
(0 votes)
AdBottom1