×

Atenção

JUser: :_load: Não foi possível carregar usuário com ID: 430

Governu Fasilita Kondisaun Di’ak Ba Timoroan iha Rai Liur Tuir Eleisaun

By KI Janeiru 21, 2017 1123

DILI: Ministru Estadu no Prezidénsia Konsellu Ministru no  Portavós Ofisiál Governu Timor-Leste, Agio Pereira informa katak,  governu sei loke kondisaun ba sidadaun sira ne’ebé hela iha rai-li’ur atu partisipa iha eleisaun

Ba eleisaun prezidensiál no parlamentár  nian sira iha tinan ida ne’e, Governu Timor-Leste kria daudaun ona kondisaun sira ne’ebé bele fasilita liután partisipasaun husi sidadaun timoroan sira ne’ebé maka hela iha rai-li’ur. 

Rejistu kona-ba eleitór sira sei hala’o to’o loron 17 fulan-janeiru, iha Lizboa [Portugál], Sydney no Darwin [Austrália], fatin hirak iha iha rai–li’ur iha ne’ebé Timoroan sira hela barak liu, atu nune’e sira hetan oportunidade atu ezerse sira-nia direitu demokrátiku iha rain hirak ne’e, durante eleisaun sira iha tinan 2017.

Husi Konsuladu Timor-Leste nian iha Sydney, Embaixadór Abel Guterres hateten katak ida ne’e hanesan dala uluk maka timoroan sira ne’ebé hela iha ema-nia rain hetan oportunidade atu tau-naran no vota iha eleisaun jerál Timor-Leste nian sira. 

Iha Darwin, Konsul Jerál, Francisco José Filipe, fó hanoin ba sidadaun timoroan sira katak “atu garante direitu ba votu nu’udar sidadaun ne’ebé hela iha rai-li’ur, uluk nanain tenke tau-naran hanesan eleitór” no hateten klaru katak “rejistu konsulár ne’e la selu buat ida”. 

Timoroan sira ne’ebé maka hela iha Portugál, ne’ebé barak liu mak estudante, haksolok tebes tanba bele hetan oportunidade tau-naran iha Embaixada iha Lizboa, iha ne’ebé ekipa ida husi Sekretaria Téknika Administrasaun Eleitorál, ne’ebé maka lidera husi Vise-Diretora, Túlia de Andrade, apoia hela rejistu kona-ba eleitór sira.

Ministériu Administrasaun Estatál, Komisaun Nasionál Eleisaun sira no Sekretaria Téknika Administrasaun Eleitorál hala’o ona kampaña nasionál sensibilizasaun nian ida, atubele insentiva rejistu kona-ba eleitór sira to’o loron 23 fulan-dezembru, tuir Konstituisaun Timor-Leste nian, ne’ebé deklara katak “sidadaun hotu-hotu ho tinan 17 ba leten iha direitu ba votu”.

Governu sei kontinua akonsella sidadaun sira kona-ba prosesu eleitorál iha fulan hirak oin mai.

Iha fulan-janeiru nia rohan, Prezidente Repúblika sei fó-sai data ba eleisaun prezidensiál sira. Eleisaun prezidensiál ne’e hotu tiha maka foin bele fó-sai  data ba eleisaun parlamentár sira.

Portavós Governu Agio Pereira, fó parabéns ba Ministériu Administrasaun Estatál, Komisaun Nasionál Eleisaun, Sekretaria Téknika Administrasaun Eleitorál no Konsuladu no Embaixada sira iha Portugál no Austrália ba sira nia esforsu tomak. “Governu ida ne’e halo ona serbisu maka’as hodi foti medida atu tulun timoroan sira iha rai-li’ur, hodi fó ba sira oportunidade atu ezerse sira-nia direitu demokrátiku, rezultadu husi ita-nia povu nia luta ne’ebé difisil. Ita rekoñese povu ne’e ninia kontribuisaun ne’ebé imporntante no kontínua ba Nasaun no sauda ninia partisipasaun iha eleisaun sira oin mai ne’e.” (KI)

Rate this item
(0 votes)

Independente Digital TV