Tanba liu husi kontaktu demais ho facebook lori mane no feto bele hasoru malu ho fásil no lalais.

Tanba ne’e Deputada  bankada CNRT komisaun F Bendita  Moniz  Magno  husu ba alin feto sira ne’ebé oras ne’e sei iha hela eskola Sekundária no Pré Sekundária atu labele uza demais facebook.

Tuir nia teknolojia mós bele sai ameasa boot ba ema nia vida iha temou ohin loron bainhira la hatene uza no la hatene kontorla  an.

Bendita dehan lia hirak ne’e bainhira partisipa iha kampanha Nasionál Prevensaun HIV/SIDA iha Eskola Sekundária Novel da Paz husi Comisaun Nasionál Combate  HIV/SIDA (CNCS-TL), Kinta (23/03).

Iha okaziaun ne’e Sekretariu Ezekutivu CNCS-TL Daniel Marçal husu ba estudante sira atu  brani hili buat ne’ebé loos  hodi hatete ba buat ne’ebé la loos tanba ema barak monu ba susar no terus sai at iha futuru kauza husi  hili dalan ne’ebé sala.

“Ita nia alunus sira ne’e presija iha konhesimentu diak atu hili dalan ne’ebé los atu nune’e bele prevene an husi virus HIV/SIDA. Tanba ne’e ami mai hodi habelar informasaun kona ba moras ne’ebé ameasa ema nia vida,” dehan Daniel Marçal.

Liu husi kooperasaun ho  Global Organization  of Parlament Against  Corruption (GOPAK) ne’ebé koalia mos kona ba  virus korupsaun  iha objektivu ida de’it  oinsa atu proteze  futuru nasaun  no povu Timor Leste  husi Virus ida ne’ebé ameasa  iha mundu tomak inkliu  TL.

Iha fatin hanesan, diretór GOPAK  João Correia hatete, virus  ne’e  seidauk bele  identifika tantu SIDA no mos Korupsuan.

Maibé  CNCS-TL no GOPAK mai antisipa fahe informasaun antes virus ne’e sai AIDS no molok ema sai koruptór.

Tanba ne’e isntituisaun rua ne’e mai disemina informasaun ba estudante  iha eskola nee  no mós  eskola Sekundária lubuk ona.

Partispa iha kampanha ne’e kuaze estudante no professor sira husi eskola refere.