Segunda, 18 Juñu 2018 | Login
Lu Olo Lu Olo

TL Apoia Apelu Papa Fransisco ba Konflitu iha Síria Featured

DILI: Estadu Timor-Leste liu husi deklarasaun Presidente Republika Fransisco Guterres Lú Olo apoia apelu Amu-Papa Fransisco no Sekretáriu Jerál Nasoins Unidas António Guterres, atu hapara funu iha Síria.

Foin lalais ne’e Amu-Papa Francisco no Sekretáriu Jerál Nasoins Unidas António Guterres apela ba lider Síria no terrorista sira atu hapara kedas violénsia no implementa sesar fogu, hodi bele fó dalan ba inisiativa hirak ne’ebé buka rezolve konflitu iha Síria liuhosi negosiasaun.

“Lori ami-nia povu nia naran, no hodi valór sira-ne’ebé sai nu’udar matadalan Estadu Timor-Leste nian, ha’u hato’o ami-nia rain nia apoiu ba apelu ne’ebé mai hosi Amu-Papa Francisco no Sekretáriu Jerál Nasoins Unidas António Guterres,”dehan Xefe Estado liu husi komunikadu, Kuarta ohin.

Konflitu iha Síria halakon ona ema rihun ba rihun nia vida, inklui labarik rihun ba rihun no ema sivíl kilat-laek seluseluk. Feto ho mane, ema boot ka labarik, maka vítima inosente ba hahalok aat ne’ebé halo ita-nia konxiénsia hakfodak.

Tanba ne’e, Presidente Lú Olo konsidera hahalok aat ne'e hanesan violasaun ba valór sira sivilizasaun nian ne’ebé mak ema defende no mós ba Direitus Umanus fundamentál iha konvensaun direitu internasionál.

Lú Olo apela katak ema hotu iha devér atu serbisu hodi kria oportunidade hirak ne’ebé di’ak ba labarik sira iha Síria, no iha fatin seluseluk ne'ebé moris iha funu, atu nune’e sira bele moris ho seguransa, haksolok iha uma-kain nia laran, iha sira-nia família laran, iha sira nia comunidade no kontribui ba dezenvolvimentu Umanidade nian. 

Read 186 times Last modified on Kinta, 08 Marsu 2018 14:26
Rate this item
(0 votes)

About Author

AdBottom1