Domingu, 23 Setembru 2018 | Login
Prezidente Bankada FRETILIN, Aniceto Guterres Prezidente Bankada FRETILIN, Aniceto Guterres

FRETILIN Ezije Harii Ekipa Inkeritu Parlamentár Antes Promulga OJE Featured

DILI: Bankada FRETILIN ezije ba Meza Parlamentu Nasionál (PN) atu harii ekipa inkéritu Parlamentár hodi haree projetu 142, antes Prezidente Repúblika (PR) promulga Orsamentu Jerál Estadu (OJE) 2018 nian.

Prezidente Bankada FRETILIN, Aniceto Guterres, husu ba PN atu harii komisaun inkéritu ba adjudikasaun projetu konstrusaun no reabilitasaun estrada, ponte, ho kontrolu seia inklui eletrisidade, ne'ebé VI Governu Konstitusionál halo iha 2017.

Konteúdu husi rekerimentu ne’ebé FRETILIN halo ne’e hakarak komisaun inkéritu ne'e atu apresia no esklarese responsabilidade Governu nian iha adjudikasaun ba projetu sira ne'e.

"FRETILIN hakarak komisaun ne'e atu buka hatene kona-ba alegasaun sira ne'ebé hatete katak mosu fallansu no ilegalidade iha selebrasaun kontratu ba projetu sira ne'ebé hala'o iha loron balu de’it molok eleisaun Parlamentár 2017" dehan Aniceto, iha Uma Fukun PN, Sesta (7/9).

FRETILIN hakarak investiga kontratu sira ne'e respeita prosedimentu aprovizionamentu no akizisaun bens no servisu tuir lei haruka, no entidade sira ne'ebé selebra kontratu sira ne'e ho Estadu kumpre rekizitu jurídiku sira ne'e ka lae. Nune’e, tenke investiga montante osan ne'ebé Governu gasta ba kontratu hirak ne'e no fonte finansiamentu ba kontratu sira ne'e hotu.

Hataan ba kestaun, Prezidente PN, Arão Noe de Jesus hatete, opozisaun sira labele ezije atu halo de’it inkéritu ba projetu 142 ne’ebé dehan la tuir prosesu aprovizionamentu ne’e.

“Ha’u konkorda atu harii komisaun eventuál ka ekipa inkéritu parlamentár la'ós ba de’it projetu 142 ne’e, maibé ida sei haree mós projetu ne’ebé implementa iha 1 Janeiru to’o 31 Dezembru 2018 nian”, dehan nia.

Komisaun ne’e sei harii iha tempu badak atu haree ba projetu hotu-hotu, ne’ebé uza osan Estadu hodi implementa inklui projetu ne’ebé halo iha VII Governu nian ne’ebé uza osan duadesimu.

Atu haree kle'an mós projetu sira iha kontratu ka lae, sé-sé mak iha projetu ne’e nia kotuk, karik ministru no deputadu balun mós hetan projetu ne’e sei haree hotu.

Karik projetu hirak ne’ebé implementa ona ne’e mak tuir duni regra aprovizionamentu ne’e sei rekomenda atu halo pagamentu karik lae, labele selu.

Read 526 times
Rate this item
(0 votes)