Kuarta, 18 Setembru 2019 | Login
FRETILIN Duun AMP Hakarak Hamamuk Fundu Petróleu

FRETILIN Duun AMP Hakarak Hamamuk Fundu Petróleu Featured

DILI: Bankada Partidu FRETILIN konsidera Governu Aliansa Mudansa ba Progresu (AMP) hakarak atu hamamuk Fundu Petrolíferu liu husi polítika alterasaun ba Lei Atividade Petrolíferu (LAP).

Liu husi intervensaun polítika, Prezidente Bankada FRETILIN, Aniceto Guterres hateten, Governu AMP halo tentativa atu halo mamuk no tau iha risku fundu petrolíferu.

Alterasaun ba Lei Atividade Petrolíferu hodi fó dalan atu foti osan direita husi fundu para investe ba esplorasaun kampu Greater Sunrise no dada kadoras.

Governu AMP tau iha OJE 2019 ho montante tokon $650 atu sosa partisipasaun Timor-Leste nian iha esplorasaun kampu Greater Sunrise, maibé ikus mai orsamentu ne’e hasai hafoin Xefe Estadu promulga LAP.

Nune’e, Governu prepara atu foti osan direita husi fundu la liu ona husi OJE maibe direta ba fundu petroliferu. Tanba ne’e, Partidu FRETILIN konsidera governu hahú hasai ona husi fundu ne’ebé fó perigu ba futuru nasaun nian.

Ne’e duni, Bankada FRETILIN ezije ba PN atu husu Governu fó esplikasaun kona-ba orsamentu hira tan mak Estadu TL sei gasta atu dada kadoras mai TL.

FRETILIN hakarak povu tomak bele akompaña osan hira mak atu dezenvolve plataforma iha tasi laran hodi hasai mina no gas iha tasi okos.

Aniceto dehan, husi totál kustu ne’e TL ninia partisipasaun 56,56% ne’ebé TL sei sosa ho osan tokon $650, maibe sei hamosu problema tanba kompañia Woodside deklara sei la investe iha dezenvolvimentu downstream iha Kampu GS.

Ne’e duni,b Xefe Negosiadór Prinsipál ba Fronteira Maritima, Kay Rala Xanana Gusmão sei la foti osan husi fundu petróleu, Estadu TL sei garante ho saida para ema bele fó emprestimu.

Maibé, nia hateten, Polítika FRETILIN nian hakarak kadoras  tenke Beasu, maibé preokupa makaas sustentablidade Fundu petrolíferu ne’ebé sai fonte úniku iha makina Estadu nian hahú mihis.

Iha fatin hanesan, Deputada Bankada CNRT, Virgínia Ana Belo afirma, Emprestimu ne’ebé governu halo la'o di'ak hela, maibé FRETILIN la tau fiar ba  kompañia Timor Gap kapasidade atu jestaun.

Tan ne’e, husu FRETILIN atu hahú ona optimista hodi apoiu Governu atu dada kadoras mai iha Beasu.

Entretantu, Deputada CNRT, Fernanda Lay dehan,  FRETILIN ninia preokupasaun kona-ba kapasidade Timor Gap presiza esplikasaun detallu atu públiku hatene.

Read 1710 times
Rate this item
(0 votes)