PM Taur Deklara Remodelasaun Kualkér Tempu Featured

By Artur da Luz Marsu 05, 2019 8713
Primeiru Ministru, Taur Matan Ruak. FOTO:doc Primeiru Ministru, Taur Matan Ruak. FOTO:doc

DILI: Primeiru Ministru, Taur Matan Ruak deklara, kandidatu membru governu hamutuk na’in 12 seidauk toma pose hodi kontinua diálogu ho Xefe Estadu. Maski remodelasaun kualkér tempu, maibé apresia mós membru Governu durante ne’e hatudu rezultadu serbisu ho kualidade.

Diálogu entre Xefe Governu ho Xefe Estadu kontinua la’o nafatin, nune’e tempu badak nia-laran bele hetan solusaun atu fó pose ba kandidatu sira ne’e.

“Remodelasaun ne’e kualkér altura. Ba dahuluk saida mak ita halo ona nune’e halo di'ak lai problema iha ne’ebé, tanba ita foin tama mai hamriik iha odamatan mak dudu malu sai daudaun ne’e ladún di’ak”, dehan PM, Taur, iha Sentru Konvensaun Dili, Sábadu (2/3).

Nune’e, kompeténsia Xefe Governu hakarak halo remodelasaun iha kualkér tempu, maibé seidauk intensaun atu remodela, tanba apresia membru Governu sira hatudu serbisu di’ak maski estrutura VIII Governu seidauk kompleta.

Matan Ruak dehan, atu nomeia kandidatu foun atu substitui lista pendente sira presiza koordenasaun ho koligasaun AMP atu foti desizaun. Maibé sira mantein lista hodi koordena ho Prezidente Repúblika atu toma pose.

Alende ne’e, Xefe Governu dehan, dekretu ezekusaun OJE 2019 anunsia ona, maibé esperiénsia VIII Governu iha kbiit jere orsamentu duadesimu no OJE 2018. Nune’e, dezafiu iha ezekusaun OJE 2019 kontinua buka dalan atu ezekuta ho kualidade.

“Naturalmente todan liu, maibé ami halo esforsu ho kbiit ne’ebé iha bele ezekuta orsamentu ne’e ho di'ak”, tenik nia.

Tanba ne’e, Primeiru Ministru rasik kontinua mantein lista pendente kontinua halo diálogu ho Xefe Estadu toma pose lista pendente sira atu estrutura governu bele kompleta hodi implementa planu ho programa prioridade Governu nian.  

Rate this item
(0 votes)

Independente Digital TV