Segunda, 13 Jullu 2020 | Login
Xanana halo visita ba Sepelata, Lospalos. Xanana halo visita ba Sepelata, Lospalos.

Xanana: Covid-19 Sei Ameasa Nafatin TL Featured

LOSPALOS: Comandante Em Chefe das FALINTIL Kay Rala Xanana Gusmão husu ba Timor-oan tomak atu nafatin kuidadu aan, tanba maske kazu pozitivu Corona Virus Deasses 2019 (Covid-19) iha Timor-Leste laiha ona, maibé la signifika TL livre total ona.

Xanana hatete, Covid-19 iha TL laiha ona, maibé iha nasaun sira seluk kazu Covid-19 sei kontinua. Lider karismatiku ne’e deklara ba komunidade sira iha Sepelata, Munisipiu Lautem, katak, maske estadu emerjensia ba Covid-19 hotu ona, maibé sidadaun idaidak tenke kuidadu an nafatin.

“Estadu emerjénsia hotu mós ameasa Covid sei kontinua, ita tama sala, ita mate barak, nasaun boot sira mós labele kontrola, apalagi ita,”dehan Xanana, Sabadu (28/06).

Xanana hatete, Covid-19 la’os Timor-Leste nia problema de’it, maibé mundu tomak nia problema. “Iha mundu tomak afeta moras Covid, liu 5 juta mate ona, mate bebeik, lorloron tama ospital, mate bebeik.

Tanba ida ne’e, Timor-Leste mós sai ameasa boot. Mezmu Estadu emerjénsia laiha ona, mais ameasa Covid sei iha nafatin, tanba bele liu husi fronteira ka sira mai husi aviaun, mais sei tama kaurentina, atu nune’e moras ne’e labele da’et,” dehan Xanana.

Bainhira ba hasoru komunidade sira iha Somocho, Xanana mós nafatin apela atu mantein disiplina hodi bele hadook an husi Covid-19.

“Husu joven sira, hahú agora mezmu estadu emejénsia laiha, maibé imi tenke komporta didi’ak, sai vizaun di’ak Somocho nian,” dehan nia.

Aliende ne’e, Sentru Integradu ba Jestaun Krize (SIJK) mós fó apelu nafatin ba Timor-oan tomak tenke nafatin kuidadu an no kumpre nafatin regras prevensaun hodi bele hadook an husi Corona Virus Deasses 2019 (Covid-19).

Maski apela ba Timor-oan atu kuida nafatin, maibé iha sorin seluk Xanana kontinua kontra nafatin regra prevensaun surtu Covid-19. Iha nia visita ba munisispiu sira atual iha Munisipiu Lautem hodi halo asaun kariedade hakuak malu no rei malu ho povu sira.

Entretantu, hafoin periodu estadu emerjensia remata iha 27 Juñu oras 00.00 serbisu husi Sentru Integradu ba Jestaun Krize (SIJK) mós remata, tanba ne’e Primeiru Ministru Taur Matan Ruak ne’ebe assume mós kargu nu’udar Ministru Interior sei lidera ekipa interministerial hodi halo nafatin pervensaun ba Covid-19.

“Hanesan ita hotu hatene iha Komisaun Interministerial ne’ebe lidera husi Ministra Saude maibé agora dadaun Primeiru Ministru mak sei lidera hanesan Ministru Interior hamutuk ho Ministériu Saude mak sei lidera ekipa sira ne’e,” dehan Odete.

Read 278 times
Rate this item
(0 votes)