“Osan ne’e povu nian, kuandu KIP la hatudu ona rezultadu serbisu di’ak liu sira na’in 11 ne’e tenke entrega fila fali osan povu nian ne’e mai Parlamentu Nasional”, dehan Vise Prezidente PN ne’e iha plenaria PN, foin lalais.

Tuir deputadu ne’e, durante membru KIP hala’o serbisu, deputadu sira seluk iha esperansa boot katak KIP sei hatudu duni rezultadu ne’ebé di’ak.

Tanba, nia hatutan, durante ne’e públiku moris iha polemika no duvida ba projetu 143.

Ba kestaun ne’e, membru KIP husi bankada PLP, Abel Pires Ximenes deklara la konkorda deklarasaun ne’ebé hatete KIP gasta osan maibé laiha rezultadu.

“Ha’u la konkorda kuandu maluk deputadu balun dehan KIP ninia serbisu laiha rezultadu, ne’e la loos. Rezultadu serbisu iha maibé relatoriu ne’e mak mosu problema,” dehan nia.

Tan ne’e, deputadu ne’e dehan nia mós la konkorda atu re-embolsa osan ne’ebé KIP gasta ona, tanba failansu ba serbisu KIP iha relatoriu de’it.

Iha fatin hanesan, Prezidente KIP Antoninho Bianco afirma, rezultadu serbisu KIP iha duni tanba KIP konsege produs relatoriu ho pajina 71, konkluzaun pajina 34 no rekomendasaun pajina 31.

“Relatoriu ne’ebé KIP halo ne’e laos atu hetan aprovasaun iha plenaria maibé ida ne’e atu sai hanesan rezolusaun ida par bele haruka ba insituisaun kompotente sira hanesan Ministeriu Publiku no KAK par bele solusiona problema sira ne’ebé mosu iha projeitu 143 ne’e,” nia esplika.

Kona-ba osan ne’ebé gasta, Antoninho dehan, osan ne’e KIP gasta ba komponente viajen tanba iha momentu ne’eba KIP fahe ba ekipa rua, inklui apoiu seguransa no aluga karreta.