Ministru Petróleu no Rekursus Minerais, Francisco da Costa Monteiro hateten, diploma ne’e ho objetivu prinsipál atu hamenus impaktu instabilidade internasionál atuál iha setór enerjétiku, garante estabilidade folin kombustivel iha territóriu nasionál, no garante kontinuidade ba nia abastesimentu.

"Agora situasaun sira ne'ebé inserteza iha mundiál no mós haree kona-ba karik medida intervensaun nesesáriu ne'ebé governu presiza halo ba presu mina nia kuandu presu ne'e sa'e makaas iha futuru, entaun saida mak governu presiza halo para minimiza impaktu boot ba ita-nia ekonómia nasionál, ida-ne'e mak ohin ami aprezenta iha konsellu Ministru hodi aprova," dehan nia, iha Palásiu Governu, horisehik.

Francisco dehan, entre medida prinsipál sira ne’ebé aprova ona, destaka estabelesimentu limite másimu ba folin kombustivel nian, ne’ebé Estadu fó subsídiu ne’ebé finansia hosi Orsamentu Jerál Estadu (OJE).

Nune’e, presu labele liu US$ 1,50 kada litru ba gazolina, US$ 1,65 kada litru ba gazóleu, US$ 2,50 kada litru ba avtur no US$ 4,20 kada kilograma ba gás (LPG).

"Define ona mós mekanizmus ba koordenasaun entre entidade públika no operadór sira setór ne’e nian atu garante abastesimentu, no mós medida exepsionál sira ba kontrolu merkadu nian, fiskalizasaun reforsada, no aplikasaun sansaun sira iha kazu infrasaun, inklui kombate dezviu ilegál (uzu ilegál) hosi kombustivel subsidiadu sira", dehan Ministru.

Francisco esplika, ho desizaun ne’e, Governu hanoin atu proteje kbiit sosa família sira nian, hamenus impaktu aumentu folin ne’ebé karik akontese iha ekonomia, no mós garante funsionamentu regulár hosi atividades ekonómikas, iha tempu hanesan hodi asegura disponibilidade hosi kombustivel durante períodu instabilidade internasionál.