TR La Simu Reklamasaun Husi PN Featured

By Ekipa INDEPENDENTE Setembru 11, 2019 3710
Edifisiu Tribunal Rekursu Edifisiu Tribunal Rekursu

DILI: Hafoin deklara inkonstitusionalidade ba Alterasaun Lei Atividade Petrolíferu (LAP) no Lei Fundu Petrolíferu, to’o agora Tribunál Rekursu seidauk simu karta reklamasaun ruma husi Parlamentu Nasionál.

 

Presidente Tribunál Rekursu, Deolindo dos Santos hatete, prazu reklamasaun ba hotu ona, maibé laiha pedidu ruma. Ne’e duni, TR konsidera parte sira simu desizaun ne’ebé sira hasai.

Ne’e duni, prosesu seluk atu ba oin ne’e iha kompeténsia Parlamentu nian liman.

Ha’u labele fó komentáriu to’o iha ne'ebá. Tanba ne’e, la'ós ha’u nia kompeténsia,” dehan Deolindo, iha Sentru Konvensaun Dili (CCD), horisehik.

Book Fundu Petrolíferu Bele Fó Malisan

Parlamentu Nasionál tuir Konstituisaun iha kompeténsia atu halo votu konfirmasaun ka hamosu diploma foun hodi Prezidente Repúblika bele haree fila-fali lei rua ne’e.

Maski nune’e, Koordenadór La’o Hamutuk, Celestino Gusmão, sujere atu lalika book lei rua ne’ebé agora daudaun iha tanba bele fó malisan ba Timor-Leste.

Nia dehan, asuntu ekonómiku kona-ba Fundu Petrolíferu sei prejudika mós seguransa seguransa ekonómiku nasaun nian, liuliu relasiona ho asesu fundu petrolíferu diretamente husi Timor GAP.

Tanba asesu ba fundu ne’e la liu husi kontrolu Parlamentu Nasionál no Tribunál Kontas nian. Ne’e duni, bele fó perigu ba fonte orsamentu úniku fundu petrolíferu.

Tuir nia, foti osan mina-rai ba operasaun petrolífera iha risku boot tebes, tanba iha operasaun ne’e iha sentidu rua ida buka mina no gás iha tasi okos no rai maran, ne’ebé prosesu peskiza bele han tempu naruk ho gastu boot.

Nune’e, bainhira kompañia Timor GAP la konsege hetan mina ka hetan uitoan de’it maka sei fó impaktu ba gastu ne’ebé halo husi fundu petrolíferu rasik.

Rate this item
(0 votes)

Independente Digital TV