TR Hasai PPT-ASDT Husi Lista Featured

By Juñu 13, 2017 2161
Tribunal Rekursu Timor-Leste Tribunal Rekursu Timor-Leste

DILI: Tribunál Rekursu (PTR) notifika ona lista kandidatura ba partidu polítiku hamutuk 21 ne’ebé hetan ona admisaun atu bele partisipa iha eleisaun lejizlativu.

Prezidente Tribunál Rekursu, Deolindo dos Santos hatete, lista kandidatura ba partidu polítika ne’ebé tama tribunál la admite mak Partidu Populár Timorense (PPT) no Asosiasaun Sosiál Demokrata Timorense (ASDT).

Partidu rua ne’e tribunál hasai husi lista eleisaun lejizlativu nian tanba la prienxe rekizitu tuir lei eleitorál nian.

Maski nune’e, partidu rua ne’e sei iha oportunidade atu rekere fila-fali desizaun tribunál rekursu nian to’o ohin, Tersa (13/6).

“Sira bele aprezenta rekursu ba koletivu Tribunál Rekursu atu nune’e Tribunál Rekursu haree fali desizaun ne’ebé horisehik ha’u hasai”, dehan Deolindo, iha servisu fatin, Kaikoli-Dili, horisehik.

Tanba ne’e, nia dehan, partidu iha 21 mak iha posibilidade atu tuir eleisaun lejizlativu, maibé karik iha mudansa ruma sira bele mai aprezenta kona-ba desizaun ne’ebé sai ona.

Nia hatutan, husi lista kandidatura 21 ne’ebé admite ona ne’e hatudu katak sira prienxe kritériu legál ne’ebé lei eleisaun lejizlativu estabelese ho regulamentu, inklui kestaun jéneru ne’ebé iha 30% husi totál kandidatura sira aprezenta.

Partidu rua ne’e atu tuir kampaña ka lae, bainhira sira aprezenta rekursu ba Tribunál koletivu iha posibilidade bele muda desizaun.

Diskute ba Lista Kandidatura PARPOL

Entretantu, iha soru-mutu entre Prezidente Tribunál Rekursu (PTR) Deolindo dos Santos ho Prezidente Repúblika (PR) Francisco Guterres ‘Lú-Olo’, diskute ba lista kandidatura partidu polítiku sira ne'ebé atu kompete iha eleisaun lejizlatura ba períodu 2017-2022.

Deolindo hateten, soru-mutu ida ne’e diskute kona lista kandidatura ba partidu polítiku sira ne'ebé tama iha Tribunál Rekursu nian.

Nia dehan, partidu polítiku sira ne'ebé atu tuir kampaña eleisaun lejizlatura nian ne'ebé oras ne’e rejistu iha Tribunál Rekursu hamutuk 21. Maibé sei iha hela faze rekursu nia laran.

“Lista kandidatura, iha hela faze rekursu nia laran, rekursu termina ohin, kuandu iha rekursu sei muda, se laiha rekursu entaun sei halo aban,” tenik nia.

Alende ne’e, soru-mutu ne’e lider órgaun soberanu rua ne’e mós diskute kona-ba serbisu Tribunál Rekursu nian, oinsá bele hala’o serbisu di'ak liu hodi serve públiku.

Rate this item
(1 Vote)
Last modified on Tersa, 13 Juñu 2017 16:52

Independente Digital TV