×

Atenção

JUser: :_load: Não foi possível carregar usuário com ID: 428

Sorteiu Eleisaun 2017: CNRT 7, PLP-PD Tuituir Malu, FRETILIN Ultimu Featured

By Juñu 16, 2017 4781
Sorteiu Elpar 2017 Sorteiu Elpar 2017

DILI: Tribunál Rekursu (TR) anunsia ona sorteiu partidu polítiku hamutuk 21 ne'ebé atu partisipa iha eleisaun lejizlativa 2017. Iha númeru sorteiu ne’e partidu CNRT hetan númeru 7, PLP no PD iha 12 no 13, nune’e FRETILIN ultimu liu ho númeru 21.

Prezidente Tribunál Rekursu (PTR), Deolindo dos Santos hateten, Tribunál admite partidu polítiku hamutuk 21atu tuir eleisaun lejizlativa ba períodu 2017-2022.

“Partidu hamutuk 21 ne'ebé sei iha posibilidade tuir eleisaun lejizlativa iha tinan 2017-2022 ne’e”, dehan nia, bainhira dirije dada sorteiu iha Tribunál Rekursu, Kaikoli-Dili, horisehik.

Husi sorteiu ne’ebé dada númeru (1) Bloco Unidade Popular (BUP), (2) Associação Popular Monarquia Timorense (APMT), (3) Kmanek haburas Unidade Nasionál Timor oan (KHUNTO), (4) Partido Esperança da Pátria (PEP), (5) Partido Socialista de Timor (PST), (6) Partido Desenvolvimento Popular (PDP), (7) Conselho Nacional Reconstrução Timor-Leste (CNRT), (8) Partido Republicano (PR), (9) União Democrática Timorense (UDT), (10) Partido Democrático do Cristão (PDC), (11) Movimento Libertação do Povo Maubere (MLPM), (12) Partido da Libertação Popular (PLP), (13) Partido Democrático (PD), (14) Unidade Nasionál Demokrátika da Resistência Timorense (UNDERTIM), (15) Partido Unidade Desenvolvimento Democrático (PUDD), (16) Partido Timorense Democrático (PTD), (17) Frente Mudança, (18) Partido Social Democrata (PSD), (19) Partido Centro Ação Social Democrata de Timorense (CASDT), (20) Partido Desenvolvimento Nacional (PDN), (21) FRETILIN.

Ida ne’e mak sorteiu ba lista kandidatura ne’ebé sei atribui númeru buletin votu. Tribunál rekursu lee sai husi primeiru to’o ultimo, ne’ebé sei elabora ata depois sei halo regra no sei haruka ba STAE no CNE.

Iha fatin hanesan, Diretór Jerál STAE, Acilino Manuel Branco hatete, ohin sorteiu ne’e hanesan ultima aktu ba prosesu lista kandidatura sira nian.

Partidu ida-idak sei fó nafatin oportunidade ba sira atu bele mai halo konfirmasaun ba sira nian naran partidu polítiku nian.

Nia dehan, tanba lista ne’ebé tama iha faze eskrisaun ne’ebé mai ho língua ne’ebé la hanesan halo implikasaun ba buletin votu. Ne’e duni, fó nafatin tempu ba Tribunál Rekursu atu halo konfirmasaun hotu tiha ultima notifikasaun sei haruka ba iha STAE no CNE.

“Hafoin simu notifikasaun sei konvida reprezentante ba pontu vokais ba partidu admitidu atu bele aprezenta sira nia konfirmasaun nia sigla, bandeira no emblema, ne'ebé sei utiliza ba buletin votu”, hatete Acilino.

Nia dehan, semana oin STAE bolu reprezentante partidu polítika sira bele halo konfirmasaun ba buletin votu hodi distribui ba munisípiu no rai li'ur.

Segundu Komisáriu CNE, Duarte Tilman hateten, komisaun halo hela verifikasaun hodi halo ajustamentu oráriu no fatin kampaña husi partidu polítiku sira hotu no depois komisaun nasionál sei verifika, kuandu iha partidu balun ne'ebé ho oráriu, loron no fatin hanesan komisaun sei bolu fali sira hodi halo ajustamentu husu sira ne'ebé tama uluk respeita sira no ba sira ne'ebé tama ikus tenke ajusta tuir oráriu ne'ebé iha hodi bele garante labele soke malu.

Kona-ba debate partidu polítiku CNE sei organiza sei iha tan reuniaun mak sei determina atu fahe ba loron tolu ka ida de'it, mezmu sira halo kampaña durante loron tolunulu.


PPT-ASDT Elimina Husi Lista Eleisaun

Tribunál rekursu deside hodi la admite partidu rua Partidu Povu Timor (PPT) no Associação Social-Democrata Timorense (ASDT) husi lista partidu polítiku ba eleisaun lejizlativa períodu 2017-2022 tanba la prienxe rekizitu.

Tribunál labele admite ASDT tanba hatama lista kandidatura rua. Nune’e, ba PPT nunka mais kompete iha eleisaun prezidensiál no eleisaun suku. Tanba ne’e, Tribunál Rekursu hasai sira nia lista kandidatura.

Juisa Ana Maria Natércia ne’ebé prezide desizaun koletiva ne’e hateten, tribunál rekursu la admite lista kandidatura ne’ebé partidu polítika sira hato’o.

Nia esplika, iha akordaun halo iha konferénsia ida ne’e liu husi juis koletivu ne'ebé kompostu husi Ana Maria Natércia, Jacinta Correia da Costa no Guilhermino da Silva.

Tribunál rekursu la admite ba partidu rua ne’e tanba partidu ASDT hatama lista kandidatura rua. Nune’e PPT la bele aprezenta lista kandidatura ba iha tinan 2017 katak nia la merese atu aprezenta lista kandidatura tanba liu tia tinan lima (5) nunka envolve iha eleisaun ruma mezmu iha nivel lokál ka nasionál.

Nia hatutan, la hetan dokumentu ruma iha aktu kona-ba kualkér partisipasaun husi partidu PPT ho nia programa rasik iha eleisaun nivel lokal ka nasionál. Tanba ne’e, tribunál labele permite tanba laiha programa ba ultima tinan lima ne’e.

Partidu PPT loos duni katak iha tinan 2012 nia fó nia apoiu tomak ba iha PD, maibé apenas karta kredénsia, maibé ne’e labele. Estatutu la dehan ida ne’e. Tanba ne’e, Tribunál Rekursu la admite partidu rua ne’e. 

Rate this item
(1 Vote)
Last modified on Sexta, 16 Juñu 2017 13:54

Independente Digital TV