Politika MS Trava Virus Corona Tama TL: Izola iha Indonezia-Australia Featured

By Fevereiru 03, 2020 6263
Diretora Jeral Prestasaun Saúde, MS, Odete Viegas Diretora Jeral Prestasaun Saúde, MS, Odete Viegas

DILI: Organizasaun Mundial ba Saúde (OMS) ofisialmente deklara ona estatutu emerjensia global ba virus corona ne'ebé oho ona ema atus rua resin iha Xina.

Relasiona ho ida ne'e, governu Timor-Leste mós hahú halo asaun balun atu evita virus ne'e tama TL.

Hanesan nasaun ida ne'ebé seidauk iha fasilidade sufisiente hodi identifika no halo tratamentu ba virus corona, governu TL mós hahú hanoin oinsa atu bele trava virus corona labele tama mai to'o Timor-Leste.

Ho nune'e, Ministériu Saúde (MS) Timor-Leste planeia halo kooperasaun ho Indonezia no Australia atu izola ema sira ne'ebé hakarak tama mai Timor-Leste durante loron 14 molok autoriza sira tama mai TL.

“Ministériu Saúde sei koopera ho embaixada Xina no mós MNEK karik iha mós posibilidade atu bele halo karentina ba pasajeiru sira husi país afetadu la'os ba (ema) Xina de'it maibé ba pasajeiru hotu-hotu ne’ebé halo viajen ba area afetadu, halo kuarentena iha Indonezia, Darwin-Australia, atu bele kompleta sira-nia periodu enkubasaun (loron 14),” dehan Diretora Jeral Prestasaun Saúde, MS, Odete Viegas iha edifisiu MS, Kaikoli, Sabadu (01/02).

"Sira labele mai direitamente antes sira-nia periodu enkubasaun (loron 14) hotu atu labele hada’et ba pasajeiru sira seluk," nia hatutan.

Nia hatutan, maske iha TL seidauk iha kazu virus corona, maibé MS halo nafatin preparasaun oinsa atu halo atendimentu no prevensaun ba virus corona.

Aleinde ne'e, nia hatutan, MS sei enkontru hamutuk ho OMS hodi kria planu asaun konkreta ida atu nune'e iha tempu badak bele espalla ona informasaun no alerta kona-ba situasaun no kazu iha nasaun sira ne'ebé afetadu virus corona.

"Husi OMS sira sei apoiu MS oinsa atu bele divulga informasaun ne’e ho di'ak liu tan".

Prepara Ekipamentu Protesaun Serbisu husi ekipa sira ne'ebé governu destaka iha aeroportu hodi halo teste ba ema sira ne'ebé foin tama Timor-Leste sita atensaun.

La'os tanba sira-nia maneira halo teste maibé tanba ekipamentu ne'ebé sira uza bainhira halo teste la priense kriteria.

Ho realidade ne'e, Organizasaun Mundial ba Saúde (OMS) iha Timor-Leste hamutuk ho UN Residence fó apoiu ekipamentu ba profesional saúde no pesoal alfandega ne'ebé halo teste ba ema sira ne'ebé tama TL.

"Ekipamentu sira ne’ebé atu apoiu mak protesaun ba profesional saude, pessoal sira husi alfandega no mós imigrasaun uza Personal Protection Equipments hanesan faru kompletu ho nia oklu, maskara, luvas, atu bele halo atendimentu ba pasajeiru sira ne’ebé hetan kazu", informa Odete.

Kona-ba pesoal saúde ne'ebé mak destaka iha Aeroportu, Odete dehan, daudauk ne'e iha Aeroportu Komoro iha pesoal saúde na'in 5, iha fronteira Batugade iha pesoal saúde na'in 3 no iha Portu Dili iha pesoal saúde na'in 3. Tuir informasaun husi OMS, daudauk ne'e nasaun 25 mak afetadu ona virus corona mak hanesan Australia iha kazu 12, Cambodia iha kazu 1, Kanada iha kazu 4, Hong Kong iha kazu 14, Fransa iha kazu 6, Finlandia iha kazu 1, Alemaña kazu 8, India kazu 2, Italia kazu 2, Japaun kazu 20, Malazia kazu 8, Nepal kazu 1, Filipina kazu 2, Rusia kazu 2, Singapura kazu 18, Korea Sul kazu 15, Espana kazu 1, Srilanka kazu 1, Sweden kazu 1, Taiwan kazu 10, Tailandia kazu 19, United Kingdom kazu 2, Amerika kazu 8, Arabia kazu 5 no Vietnam kazu 6. Labele Paniku Arsebispu ba Arquidiocese Metropolitanu Dili Don Virgílio do Carmo da Silva SDB husu ba sarani sira hotu iha Timor laran tomak atu labele pániku ho virus Corona.

"Ida ne’e kompetensia Ministériu Saúde ninian maibé atu dehan katak iha situasaun sira hanesan ne’e ita mós tenke hatene atu kuida aan ne’e iha ne’ebé de’it, la’o ne’ebé de’it ba presiza kuida aan hanesan ema dehan katak saúde ne’e iha ida-idak nia liman, ne’eduni la hatene kuida saúde moras mak ne’e," dehan Don Virgilio hafoin diálogu ho PR Lu Olo, Sesta (31/01).

Rate this item
(1 Vote)

Independente Digital TV