Sábadu, 07 Dezembru 2019 | Login
Deputadu Somoxo Deputadu Somoxo

PN La Autoriza Somotxo sai Sasin iha Tribunal Featured

DILI: Parlamentu Nasionál liu husi prosesu diskusaun no votasaun ne’ebé taka ba públiku deside hodi la autoriza deputadu Bankada FRETILIN José Agostinho Sequeira Somotxo hodi sai sasin iha tribunal ba kazu trafiku arma illegal.

Liu husi prosesu votasaun, deputadu sira iha PN na’in 34 vota kontra no na’in 4 abstensaun. Signifika, PN la fó autorizasaun atu hasai deputadu Somotxo ninia imunidade hodi bele fó sasin iha Tribunal Distrital Dili (TDD).

Prezidente Komisaun A PN trata asuntu Konstituisaun no Justisa Carmelita Moniz informa, nia parte simu notifikasaun TDD nian husi Prezidente PN atu hasai imunidade deputadu Somotxo hodi sai testamuña.

Deputada ne’e dehan, Komisaun A sente hakfodak ho akuzasaun ne’ebé tribunal anexa ho pedidu levantamentu ba imunidade deputadu Somotxo.

“Ami lee akuzasaun ami hakfodak loos, la devia prokuradór prosesu ka juiz halo akuzasaun ida ne’ebé tornase públiku hodi konta sai hotu kona-ba mekanizmu serbisu intelijensia nasional ba seguransa pais nian,” deklara Carmelita iha plenaria PN, Segunda (14/10).

Ho nune’e, Prezidente Komisaun A ne’e rekomenda ba plenaria atu labele fó autorizasaun ba deputadu Somotxo hodi sai sasin iha tribunal tanba liga ho seguransa nasaun, liu-liu ba serbisu intelijensia.

“Komisaun A hakarak hato’o ba ita-boot sira katak ami rekomenda ba plenaria atu labele autoriza deputadu Somotxo tanba liga ho seguransa pais, liu-liu ba serbisu intelijensia,” deklara nia.

Iha fatin hanesan, deputadu Somotxo deklara ladun kontente ho pedidu husi tribunal relasiona desizaun atu kombate krime organizadu ne’ebé nia foti bainhira sei assume kargu nu’udar Ministru Defeza no Seguransa.

“Kazu ne’e trafikante armas ilegál ne’e uluk ita halo inflitrasaun ba rede ne’e, kaer ema na’in rua ba iha prizaun preventiva, agora ida ne’e mak ha’u atu ba testamuña.”

Nia dehan, bainhira nia sai nu’udar Ministru Defeza no Seguransa, nia lori estadu Timor Leste nia naran hodi kombate krime organizadu.

“Ha’u atu ba sasin mós labele tanba uluk ha’u Ministru Defeza no Seguransa foti desizaun (ikus mai) ba sasin fali kriminozu ida, ne’e tenke hatene didi’ak, hanesan Ministeriu Justisa, Juiz no Tribunál hatun ona maibé tenke reve fali nia desizaun,” dehan nia.

Read 2143 times
Rate this item
(1 Vote)

About Author

MidAd1