PN Kansela Viajen PR Lú Olo Ba Dala Tolu Featured

By INDEPENDENTE Outubru 25, 2018 2321

DILI: Parlamentu Nasionál PN, liu husi sesaun plenária deside hodi la autoriza dezlokasaun Prezidente Repúblika (PR), Francisco Guterres ‘Lú Olo’ hodi ba partisipa konferénsia internasionál Forum Bali Democracy.

Planu viajen Xefe Estadu ba Indonézia hodi responde ba konvite Prezidente Indonézia, Joko Widodo, ba konferénsia Forum Bali Democracy, maibé PN la autoriza tanba maioria husi deputadu 31 vota kontra no afavor 19.

Ho kanselamentu ne’e Parlamentu Nasionál kansela ona viajen Estadu Prezidente Repúblika nian ba dala tolu. Antes ne’e viajen ba Portugál no Estadu Unidus Amérika (EUA) no ikus maka Indonézia.

Posibilidade kanselamentu ba dezlokasaun Xefe Estadu nian sei kontinua, tanba tuir planu iha tinan ne’e nia laran sei halo viajen mós ba Roma-Itália.

Haree ba ambiente polítika iha Uma Fukun PN, Deputadu Bankada FRETILIN, David Dias Ximenes ‘Mandati’ hatete, sensibilidade deputadu sira liu-liu Aliansa Mudansa ba Progresu (AMP) ne’e laiha ona, tanba halo impedimentu dala barak ba viajen Xefe Estadu nian.

“Antes ne’e kansela viajen Prezidente Repúblika tanba OJE 2019 seidauk promulga, maibé ohin loron promulga ona saida mak sei problema, tanba ne’e kontinua halo kanselamentu ba Xefe Estadu nia viajen”, dehan nia, iha plenária PN, horisehik.

Nia hatutan, PR hanesan ema ne’ebé númeru ida iha nasaun atu lori Estadu nia naran ba halo kooperasaun bilaterál iha rai li'ur, maibé PN rasik la autoriza.

Tuir FRETILIN nia haree, Prezidente PN, Arão Noe de Jesus, vizita ba iha estranjeiru ne’ebé ba tuir reuniaun Inter-Parlamentár, ne’ebé la importante maibé autoriza ba.

Entretantu, Vise-Prezidente Bankada Partidu CNRT, Patrocínio Fernandes hateten, vizita Estadu ne’ebé PR ba iha Indonézia ne’e importante, maibé problema iha rai laran importante liu viajen estranjeiru.

“Ami la autoriza dezlokasaun Prezidente Repúblika nian ba Indonézia tanba razaun polítika, kandidatura membru governu na’in sia seidauk simu pose”, dehan nia, iha Uma Fukun PN, horisehik.

Nia hatete, problema iha rai laran importante, tanba ne’e di'ak liu rezolve uluk hafoin bele ba rai li'ur.

Nia hatete, la autoriza Xefe Estadu ba Indonézia laiha implikasaun ba relasaun bilaterál rai rua nian, tanba Governu liu husi Ministériu Negósiu Estranjeiru atu haree ba asuntu ne’e.

Viajen Ba Roma Hein Desizaun

Entretantu, viajen PR Lú Olo ba Roma-Itália atu tuir peregrinasaun no mós konvida Amu Papa mai vizita TL ne’e hein desizaun husi PN.

“Ita nia Amu Papa ne’e konvida ha’u atu ba Roma. Amu Papa dezeju tebe-tebes ha’u ba Roma atu bele mós hodi konvida sua santidade Amu Papa mai vizita TL,” dehan PR Lú Olo, iha Sentru Konvensaun Dili (CCD), horisehik.

Núnsiu lori konvite ne’e mai Prezidente Repúblika hodi fó hatene maibé sei hein PN maka deside.

PR Lú Olo hatutan pedidu ba viajen nian ne’e Prezidénsia aprezenta ba Parlamentu Nasionál (PN) ne’e uluk kedas ona ba programa vizita nian ne’e.

Prezidente Repúblika simu ona konvite husi Vatikanu atu tuir peregrinasaun iha Roma tuir planu sei ba iha loron 23 Novembru 2018.

Rate this item
(0 votes)

Independente Digital TV