Pesoál Polisia Tiru Ema iha Kuluhun Tolu Mate, Lima Kanek Featured

By Tome Amado Novembru 19, 2018 2210

DILI: Pesoál Polisia na’in rua ho inisiál JPA no FMS husi Unidade Polisia Marítima (UPM) no Servisu Informasaun Polisia (SIP), Domingu (18/11), maizumenus tuku 12:15, madrugada, tiru ema na’in ualu ne’ebé rezulta na’in tolu mate no lima seluk kanek.

Kazu ne’ebé akontese iha festa kore-metan ida iha Kuluhun, Suku Akadiruhun Postu Administrativu Na’in Feto, Munisípiu Dili.

FMS nu’udar membru Polisia Unidade Marítima (UPM) maka halo festa ne’e. Iha ne'ebá konvida família, kolega membru polisia sira, inklui JPA.

Martinha Xavier, sasin ne'ebé haree akontesimentu ne’e dehan, labarik joven sira mak halo uitoan barullu iha festa laran, maibé la’ós problema boot. Nune’e, pesoál polisia JPA no FMS mós hemu hela tua iha tenda laran.

Derrepente de'it sira na’in rua hasai pistola tau tiha iha kadeira leten no tiru sinál ba leten halo ema hotu iha tenda laran hakfodak. Hafoin ne’e, sira se fali pistola ne’e ba ema sira iha tenda laran no tiru arbiru de’it.

“Ami hotu haree akontesimentu ne’e toba hotu ba rai. Sira na’in rua tiru nafatin la para”, tenik nia, iha Mortuariu Ospitál Nasionál Guido Valadare (ONGV), Bidau, horisehik.

Vítima na’in tolu ne’ebé mate maka Luis Gevin Saldanha (18), Leonaldo Eduardo Ximenes (20), Erick Jhony Ribeiro (24).

Nune’e, na’in lima seluk ne’ebé hetan kanek maka hanesan Pinto Gamu (25) Paulino de Jesus (36) Teresinha Vila Nova (23), no Lúcio do Carmo (30), no Agrifino de Jesus (31).

Na’in tolu ne’ebé mate Luis Gevin Saldanha (18) hetan tiru iha ninia garganta diskuidu tama liu husi ninia kabun laran borus mai nia kotuk, Leonaldo Eduardo Ximenes (20) hetan tiru iha ninia kanoruk borus mai ninia garganta, Erick Jhony Ribeiro (24) hetan tiru iha ninia ulun parte karuk no borus mai sorin loos.

Husi sira na’in lima ne’e, Lúcio do Carmo no Pinto Gamu hetan ona operasaun hodi hasai bala musan ne'ebé metin hela iha sira nia isin. , no vítima Agrifino de Jesus (31) ne’ebé hetan tiru iha ninia kanoruk karuk no borus mai ninia hasan oin.

Alende ne’e, vítima Teresinha Vila Nova (23) hetan tiru iha ninia liman parte loos no rezulta ninia ruin rahun. Nune’e, Paulino de Jesus (36) kona tiru iha ninia liman kabun parte loos.

Iha sorin seluk, Komandante Jerál PNTL, Komisáriu Polisia Júlio da Costa Hornai, hato’o sentidu kondolénsias ba família matebian ba kazu ne'ebé ninia membru halo ona.

“Ha’u triste kuandu rona ita-nia joven, ita nia-oan sira balun hakotu iis no balun tenke lori ba ospitál tan de’it individu polisia balun ninia hahalok”, tenik nia.

Nia rekoñese, akontesimentu ne’e loos duni. Tan ne’e, husu ona ba departamentu tolu ne'ebé mak iha kbiit tomak tau matan ba asaun krime ne'ebé membru sira ezekuta ona sira nia servisu hodi loke prosesu investigasaun imediata.

Hornai hatutan, atitude membru na’in rua ne’e nian la serve atu hatudu ba povu ki’ik ne'ebé laiha forsa. Tanba lei rasik la fó dalan atu halo asaun ne’e. Komandu rasik la tolera atitude ne’e no husu atu responsabiliza hahalok sira ne’e.

Nune’e, komandu rasik iha tempu badak sei halo aprosimasaun ho família matebian para atu tuur hamutuk oinsa atu haree ba prosesu ikus serimónia funerál nian.

Suspensaun Preventiva Ba JPA-FMS

Komandu PNTL, Komisáriu Júlio da Costa Hornai, Domingu (18/11), hatún ona despaxu suspensaun preventiva ba pesoál Polisia JPA no FMS ne'ebé halo ona asaun brutalizmu hodi tiru ema na’in ualu iha Kuluhun Baixu.

Komjer simu informasaun kona-ba akontesimentu ne’e besik tuku 03:00 madrugada no orienta kedas Servisu Investigasaun Kriminál Munisípiu Dili no Nasionál, inklui xefe departamentu justisa nian hodi halo kedas kapturasaun ba membru na’in rua ne’e.

“Ha’u orienta ona kapturasaun ba individiu polisia na’in ne’e para atu asegura ba prosesu investigasaun no dixiplinár”, dehan Júlio, iha servisu fatin, horisehik.

Nia esplika, atuasaun komandu nian mak foti ona medida kautelar no ámbitu prosesu dixiplinár hodi fo suspensaun preventiva no dezarmamentu para atu submete ba detensaun oras 72, tanba konsidera kazu ne’e flagrante de litu.

Nu’udar Komandante, kontinua ezije ba SIK atu halo prosesu ne’e lalais para komandu bele rona lalais rezultadu husi Tribunál ba kazu ne’e.

Entretantu, envolvimentu JPA no FMS nian iha Domingu madrugada kalan ne’e komandu Polisia Eskuadra Kristu Rei halo kedas intervensaun no konsege asegura suspeitu na’in rua ne’e iha tuku 01:30 hodi lori kedas mai iha komandu Kaikoli. Agora daudaun SIK Nasionál halo hela prosesu investigasaun hodi kompleta oras 72 para atu aprezenta ba Ministériu Públiku.

Armas Haloot iha Armori

Komandu PNTL orienta dala ida tan ba Komandu Unidade sira hotu atu rekolla arma hotu iha membru sira hodi fali iha armori kuandu tempu servisu remata ona.

Komisáriu Júlio dehan, despaxu ne'ebé hatún ona tenke implementa utilizasaun arma iha fora servisu la autoriza tan.

“Ha’u orienta ona komandu hotu-hotu atu asegura arma sira hotu iha armori ida-idak nian”, tenik nia.

Nu’udar Komandante Jerál, nia deskontente ho atuasaun no atitude individu membru na’in rua nian. Utilizasaun arma iha ninia regra no tuir nesesidade ultima rekursu. Maibé haree ba kazu ne'ebé akontese ne’e la nesesita atu uza rekursu ne’e.

Rate this item
(1 Vote)
Last modified on Tersa, 19 Marsu 2019 18:08

Independente Digital TV