Sexta, 18 Outubru 2019 | Login
Reuniaun Konsellu Ministrus Reuniaun Konsellu Ministrus

OJE 2020, Governu Propoin Billaun $1.6 Featured

DILI: Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak propoin orsamentu hamutuk billaun $1.6 iha Orsamentu Jeral Estadu (OJE) 2020.

VIII Governu Konstituisionál ne’e foti desizaun refere liu husi reuniaun Konsellu Ministru hodi tetu fiskal OJE 2020.

Iha OJE 2020, governu AMP sei tau prioridade ba area tolu mak hanesan dezenvolvimentu kapital sosial, dezenvolvimentu ekonomia, no konektividade nasionál.

Ministru Prezidente Konsellu Ministru Hermegildo Augusto Pereira Cabral hatete, iha reuniaun Konselu Ministru deside aprova final orsamentu fiskal billaun $1.6 ba OJE 2020.

“Governu sei aprezenta billaun $1.6 ba parlamentu (nasionál)… sei hatun ba parlamentu antes loron 15,” informa Agio hafoin enkontru KM, Kuarta (31/08).

Ba area prioridade, Ministru ne’e dehan, KM haree area barak mak prioridade no importante.

Iha OJE 2020, Agio hatete, prevee mós orsamentu hodi sosa ro berkasa tolu atu transporta material ba munisipiu sira husi tasi hodi redus  kamioneta nune’e estrada labele aat lalais.

Aleinde ne’e, nia hatutan, prevee mós orsamentu hodi hadia sala aula ba edukasaun nian hamutuk 400 resin.

“Sei haree mós projetu boot ida Sekretariu Estadu Formasaun Profisionál no Empregu mak resposabiliza ba formasaun vokasionál ba Timor-oan, ne’ebe sei halo eskola ida atu halibur sira,” esplika ministru ne’e.

Iha fatin hanesan Ministra Finansas Interina Sara Lobo Brites hatete, hafoin KM aprova sei distribui envelope fiskal iha semana oin atu ministériu idaidak prepara sira-nia submisaun.

Iha reuniaun KM ne’e mós, nia dehan, aprova kalendariu OJE 2020 ne’ebé loloos iha 17 Jullu 2019, maibé tanba governu fó atensaun ba lei fronteira maritima, nune’e sei sumbete fila fali kaledariu atu ministeriu idaidak bele submete rekejitus iha lei iha 15 Outubru 2019.

Ministra ne’e afirma, prioridade boot tolu ba governu iha OJE 2020 mak dezenvolvimentu kapital sosial ne’ebé haree liu area edukasaun, formasaun, saúde, fornesimentu bee-moos no infra-estrutura saneamentu baziku.

Area seluk mak dezenvolvimentu ekonomia liu husi aposta insentivu ba invesimentu setór privadu, kriasaun ba empregu, iha diversifikasaun ekonomia no dezenvolvimentu iha setór agrikultura.

Area ikus liu mak konektividade nasional ba dezenvolvimentu portu, aeroportu, estrada rural no urbanu, dezenvolvimentu lojistika nasionál, no kriasaun husi prosesamentu, armazenamentu, transporte tasi, bee, rai-maran no aero.

Husi OJE 2020 ho total billaun $1.6 ne’e, Ministra dehan, iha aumentu ba seitor edukasaun no saúde.

“Iha area edukasaun aumentu porsentu 6 husi OJE 2019, sa’e, no porsentu 9 husi OJE 2018. Orsamentu ba setor saúde hetan aumentu ba porsentu 39 husi OJE 2019. Aumenta porsentu 9 husi OJE 2019 no porsentu 12 husi OJE 2018.”

Ba setor ekonomia no infra-estrutura, Ministra ne’e dehan, sei reprezenta porsentu 41 husi OJE 2020, ho montante orsamentu tokon $654 ba asuntu ekonomia no tokon $13.5 ba infra-estrutura.

Read 665 times
Rate this item
(0 votes)