Molok ne’e, Sekretariu Estadu Nelio deklara katak governu sei fó osan ba atleta Timor-oan sira ne’ebé sai kampionatu iha eventu desportu iha rai li’ur.

Teofilo ne’ebé sente seidauk hetan apoiu ruma husi governu fó sai ninia lamentasaun iha media sosial facebook.

Iha ninia pajina facebook, Teofilo dehan katak Sekretáriu Estadu Juventude no Desportu Nelio Isaac bosok kompletu.

Nia konsidera mós deklarasaun husi Nelio hanesan mós ho deklarasaun iha tempu kampaña.

“Ami respeita no haraik an ba imi, maibé imi provoka ami-nia emosaun liu husi imi-nia hahalok,” Teófilo hakerek iha nia pajina facebook iha 6 Jullu tuku 16.00 lokraik.

Hatan ba kestaun ne’e, Sekretariu Estadu Nelio dehan, governu transfere ona osan kuaze rihun $250 ba federasaun sira hodi fó ba atleta ne’ebé iha prestasaun.

Nia hatutan, governu halo hotu ona prosesu no karik pagamentu ba atleta sira mak tarde ne’e la’os problema SEJD maibé problema kada federasaun.

“Prosesu hotu ona, hanesan futebol ba futebol, atletiku ba atletiku nian. Ezemplu hanesan Teófilo ba ko'alia paralimpiku, tanba osan halo ona transferénsia, osan iha Sekretáriu Estadu laiha ona,” dehan Nelio.