“Nicolau dos Reis Lobato hahú funu ita boot mak hatutan lori to’o remata. Loos Nicolau dos Reis Lobato la hahú funu ita boot mós dala ruma la sai Prezidente Repúblika, maibé Prezidente Xanana Gusmão la hatutan funu, ohin loron dala ruma Nicolau Lobato la fila-fali morin ema sei la temi Prezidente Nicolau dos Reis Lobato,” dehan José Lobato, iha Suku Soibada, Sábadu (4/7).

Ho situasaun ne’e, nia dehan, família husu deskulpa ba maun boot, maibé dala ruma família saudozu Nicolau sente maun boot lori to’o lalehan, dala ruma mós maun boot riba ba rai.

“Tinan hirak liu ba ha'u rona temi Nicolau dos Reis Lobato luta de'it tinan tolu, nu’udar oan dala ruma ha’u bele dehan fuan ladún furak, maibé ha'u hateten ba maun boot ida ne’e la'ós importante liu ba ha’u,” nia hateten.

Maibé importante liu mak saudozu mate, maun boot mak hatutan duni funu ne’e to’o remata, tanba iha fatin no tempu ne’ebé susar maibé maun boot brani hodi konsege organiza hala'o funu no lori funu ne’e to’o remata.

Nune’e bainhira funu remata maun boot hahú duni prosesu rekonsiliasaun bainhira saudozu Nicolau Lobato mate kontinua lori funu to’o remata hodi hahú rekonsiliasaun.

Nia hatutan, hakru'uk no agradese tebes maun boot nia kontribuisaun hodi harii estátua saudozu Nicolau Lobato iha Komoro, ne’ebé importante ba jerasaun foun sira.

“Ha’u komprende dala ruma maun boot hirus mai ha’u, eventu inaugurasaun estátua ha'u-nia aman, iha ha'u-nia diskursu ha'u fó hanoin balun no pensamentu, preokupasaun, ha'u hanoin pertinente momentu ne’ebá hodi ohin loron no aban-bainrua,” nia hateten.

Nia akresenta, maibé mós rekoñese hanoin ne’ebé hato’o naksalak, tanba ansi atu hato’o hanoin ida ne’e ba sensibilidade ba esforsu tomak ne’ebé maun boot harii ba estátua Nicolau Lobato.