Kuarta, 20 Janeiru 2021 | Login
×

Erro

An error occured during data fetch from google.com: Error calling GET https://www.googleapis.com/analytics/v3/data/ga?ids=ga%3A138150919&start-date=2017-01-15&end-date=2021-01-19&metrics=ga%3Avisits&dimensions=ga%3Ayear&start-index=1&max-results=1000: (403) Quota Error: profileId ga:138150919 has exceeded the daily request limit.
Diretora Arguires, Bela Gailos iha kampaña loron 16 ativismo Kontra Violensia Bazeia ba Jéneru ho tema “Hapara Violensia! Respeita Direitu Umanu! Respeita Ema Nia Liberdade!. kampanha hala'o iha kampus UNTL, kuarta (25/11). Foto INDEPENDENTE/Camilio Sousa Diretora Arguires, Bela Gailos iha kampaña loron 16 ativismo Kontra Violensia Bazeia ba Jéneru ho tema “Hapara Violensia! Respeita Direitu Umanu! Respeita Ema Nia Liberdade!. kampanha hala'o iha kampus UNTL, kuarta (25/11). Foto INDEPENDENTE/Camilio Sousa

Feto Ativista Kondena Mane Ne’ebé Konsidera Feto Hanesan “Animal” Featured

DILI: Feto Ativista Timor-Leste kondena makas hahalok mane sira ne’ebé konsidera feto hanesan animal laiha folin.

“Kazu matebian Domingas ne’ebé akontese iha Rai Kotu fulan kotuk (Outubro) sai mos lisaun ba ita katak mane sira konsidera ita feto sira hanesan animal ne’ebé laiha folin iha sira mia matan tanba ne’e mai ita hamutuk hodi kontra violensia hasoru feto no labarik feto katak ita feto iha dignidade nuudar umana laos animal,”dehan Diretora Arguires, Bela Gailos iha kampaña loron 16 ativismo Kontra Violensia Bazeia ba Jéneru ho tema “Hapara Violensia! Respeita Direitu Umanu! Respeita Ema Nia Liberdade!.

Tanba ne’e, liu husi loron primeiru ohin iha kampus UNTL (25/11) ba kampaña hapara violensia kontra feto, feto ativista husi organizasaun oioin apela ba feto sira atu hamutuk kontra violensia hasoru feto no feto labarik katak feto mós iha nia dignidade.

Diretora Arguires, Bela Gailos hateten violensia hasoru no labarik feto sira kontinua as iha Timor-Leste tanba Estadu liliu Governu ladun iha kapasidade atu prevene no kombate.

Kazu ne’e kontinua as tanba Parlamentu Nasionál no Guvernu preokupa liu ba politika oinsa mantein sira nia  poder hodi kontinua ukun Timor-Leste  enkuantu la preokupa ba violasaun hasoru feto  no labarik feto.

Kampaña kontra violensia hasoru feto no labarik feto ne’e hahú loron 25 fulan-Novembru too 10 Dezembru tinan 2020.

Kampaña ne’e hetan partisipasaun husi estudante universitariu, organizasaun juventude, organizasaun feto, organizasaun internasionál, no nasional, feto no mane ativista, joven husu sukus, lider lokal sira, relijioza, ema ho difisiensia, media no komunidade sira iha komoro.

Gailos mós triste tanba kampaña kontra violasaun hasoru feto laiha membru Parlamentu Nasionál no membru Governu mak partisipa hodi rona feto sira nia prekupasaun.

Nia rekomenda ba Timor-oan sira hotu atu iha konsensia hodi prevene violensia  hasoru feto no labarik feto tanba feto mós nuudar ema laos animal tanba ne’e atu kombate violensia hasoru feto la presija eskola boot maibé simples de’it ho asaun katak tenke promove domin, kria paz, respeita malu hodi moris saudavel no armonia iha sosiedade nia laran.

Nuudar representate feto Timor-Leste, Gailos husu maluk mane sira atu hapara ona violensia hasoru feto no labarik feto sira.

Husu mós ba Governu no Parlamentu Nasionál atu aplika lei violensia hasoru feto ne’ebé foin dadauk aprova tenke implementa ho rigorozu.

Iha fatin hanesan, Presidente Konsellu Imprensa (KI) Virgilio Guterres nuudar mane ida kontra violensia hasoru feto hateten atu prevene iiolensia hasoru feto no labarik feto Governu no Parlamentu Nasional tenke prioritiza setór seguransa no edukasaun.

"Ha’u dehan setor seguransa no edukasaun mak bele halakon tensaun violensia hasoru feto no labarik feto sira. Ha’u fó exemplu kazu Rai-Kotu ne’ebé hamate mana Domingas bele akontese tanba seguranca ladun maximu liliu PNTL dalaruma hakarak lalais atu atua maibé orsamentu laiha,”dehan Guterres.

Tuir nia katak setor edukasaun mós importante atu halokon violensia hasoru feto no labarik feto sira tanba baihira ema hotu hotu iha ona edukasaun ne’eb’e naton, sira rasik mak sei iha konsensia hodi hapara violensia hasoru feto no labarik feto sira.

Tanba ne’e, nia rekomenda ba Guverno no Parlamentu Nasional hodi tau osan boto ba setor edukasaun no seguransa hodi kombate violasaun hasoru feto no labarik feto iha iha Timor-Leste.

Read 386 times Last modified on Kuarta, 25 Novembru 2020 17:04
Rate this item
(0 votes)