Sexta, 18 Outubru 2019 | Login
Ponte Noefefan-ZEESM Ponte Noefefan-ZEESM

Ekipa Tranzisaun RAEOA ne’ebé Kria Konfuzaun Featured

DILI: Despaixu Primeiru Ministru Taur Matan Ruak hodi kria ekipa Tranzisaun ba Rejiaun Administrativa Espesial Oekusse Ambeno (RAEOA) hamosu konfuzaun ba sosiadade sivil sira.

Tanba tuir sosiadade sivil bainhira governu kria ekipa Tranzisaun signifika governu hakarak hasai hotu ekipa ne’ebé durante ne’e serbisu iha RAEOA hodi troka ho ekipa foun.

“Governu kria fali ekipa tranzisaun signifika Prezidente (RAEOA) tuan nia ekipa sai hotu, entaun Arsenio Bano labele lidera (RAEOA) tanba sira ba ho ekipa, laos atu ba troka de’it Prezidente,” deklara Diretór Organizasaun Naun-governamental (ONG) Luta Hamutuk, Jose Alves iha nia knaar fatin, Farol, Kinta (01/08).

Diretór ne’e esplika, tuir loloos molok fulan ida mandate Prezidente Autoridade RAEOA Mari Alkatiri remata, governu aprezenta ona kandidatu foun ka bele re-kandidatu, nune’e bainhira mandatu remata bele ofisialmente entrega poder ba malu.

Maibé, nia dehan, to’o mandate Alkatiri remata governu seidauk nomeia figura ida hodi troka. Foin lalais ne’e PM Taur deklara, bainhira mandate Alkatiri remata no seidauk iha figura atu troka, ema daruak iha RAEOA bele lidera durante loron 120.

Maibé, Diretór LH ne’e dehan, despaisu ne’ebé PM Taur hatuun hodi kria ekipa tranzisaun hatudu buat ne’ebé diferente.

Ho situasaun ne’ebé daudauk ne’e mosu, José dehan, sei mosu kontra ideia entre ekipa tranzisaun ho ekipa RAEOA durante lideransa Arsenio Bano.

Iha fatin ketak, Ministru Reforma Lejizlativa Asuntu Parlamentár (MRLAP) Fidelis Magalhães Leite hatete, ekipa tranzisaun ne’e forma bazeia ba despaisu husi PM Taur.

Nia dehan, ekipa ne’e atu halo preparasaun hodi simu Prezidente Autoridade RAEOA foun. “Ekipa tranzisaun atu ba haree buat ne'ebé mak la’o ona, to’o iha ne'ebé, saida mak hala'o ona, to’o iha ne'ebé, tanba despaisu husi Primeiru Ministru nian nune’e ekipa ne’e iha kompeténsia tomak atu hala'o knaar ida ne’e,” dehan Ministru Fidelis iha Suai Room Timor Plaza, horseik.

Ministru ne’e dehan, governu iha konfiansa ba Prezidente Ekipa Tranzisaun, Helder Lopes hodi hala'o avaliasaun no hetan informasaun atu bele relata ba Primeiru Ministru.

Kona-ba kandidatu ba Prezidente Autoridade foun RAEOA, Ministru ne’e dehan, asuntu ne’e di’ak liu konfirma ho PM Taur.

“Kona-ba see mak atu troka, Prezidente (RAEOA) foun ne’e konfirma ho Primeiru Ministru mak hatene, hafoin iha deliberasaun Konsellu Ministru mak foin decide,” dehan nia.

Read 1810 times
Rate this item
(0 votes)
MidAd1