×

Atenção

JUser: :_load: Não foi possível carregar usuário com ID: 430

Deolindo Prezidente Tribunál Rekursu Foun Featured

By INDEPENDENTE Abril 26, 2017 3327
Tribunal Rekursu Tribunal Rekursu

DILI: Prezidente Repúblika nomeia ona juis Deolindo dos Santos hodi sai Prezidente Tribunál Rekursu foun. Nune’e, deside hodi estende mós mandatu Prokuradór Jerál Repúblika (PJR), José Ximenes.

Tuir planu, Prezidente Tribunál Rekursu no Prokuradór Jerál Repúblika sei simu pose iha Sesta (28/4).

Pozisaun prokuradór jerál nian sai polémika, tanba governu hakarak atu hein prezidente repúblika foun. Maibé, Prezidente Repúblika, Taur Matan Ruak, uza nafatin ninia kompeténsia hodi halo estensaun.

Entretantu, Deputadu Francisco Branco hatete, tuir lei perante hodi fó kompeténsia ba presidente repúblika atu bele halo nomeasaun ba Prokuradór Jerál Repúblika, maibé iha períodu ne’e husik ba prezidente repúblika foun atu bele halo desizaun.

Tuir nia, ho razaun ida mak kuandu iha sira nia mandatu akontese buat ruma presidente repúblika foun bele responsabiliza.

Ema ruma atu asumi fali kargu ne’e karik bele sai hanesan interinu atu bele responsabiliza servisu ne’e iha tempu badak, hodi hein tomada pose ba prezidente repúblika foun mai mak bele halo nomeia.

Deputadu Arão Noe hatete, tuir lei nomeasaun ba Prokuradoria Jerál Repúblika ne’e governu mak iha kompeténsia halo proposta hodi aprezenta ba presidente repúblika atu bele hili.

Prezidente repúblika laiha kompeténsia atu halo nomeasaun hili direita ema ida atu asume knaar prokuradór jerál la ho proposta husi governu.

Tuir ninia dalan, prosesu ne’e hanesan mós ho nomeasaun ba Brigadeiru Jenerál FFDTL nian, governu mak tenke aprezenta proposta ba presidente repúblika atu bele deside no hili ema ida.

“Laiha dalan ba presidente repúblika atu nomeia ema ida atu sai Prokuradór Jerál Repúblika sem proposta husi governu”, dehan Arão, iha parlamentu nasionál, horisehik.

Tuir Deputada Carmelita Monís husu ba órgaun soberania sira atu hein prosesu inspesaun ba juis sira, ne’ebé sei pasa ba primeira klase mak foin bele halo noemasaun. Tanba durante ne’e seidauk iha avaliasaun ruma ba juis sira.

Nia hatutan, atu xefia órgaun soberania ida presiza atu tetu didi'ak hodi haree nia kapasidade, profisionál, imparsialidade no deontolojia, tanba iha inspesaun ne’e atu tetu no avalia buat hirak ne’e.

Entretantu, Sistema Monitoriu ba Programa Judisiáriu (JSMP) konkorda ho desizaun prezidente repúblika nian ne’ebé hili ona juis Deolindo dos Santos hodi troka Guilhermino da Silva ba kargu Prezidente Tribunál Rekursu.

Tuir Diretór Ezekutivu JSMP, Luis Oliveira hateten, juis na’in rua Deolindo dos Santos no Maria Natércia Gusmão mak bele troka atuál PTR, tanba sira na’in rua iha kapasidade.

Rate this item
(1 Vote)

Independente Digital TV