Kuarta, 23 Outubru 2019 | Login
kampanha CNRT iha tinan 2017 kampanha CNRT iha tinan 2017

CNRT Husu PN Akompaña MJ Sobu Mafia Featured

DILI: Bankada CNRT iha Parlamentu Nasionál (PN) husu ba Prezidente PN atu delega membru Komisaun balun hodi akompaña Ministru Justisa Manuel Carceres sobu mafiozu sira ne’ebé hakarak impede interese estadu nian.

Prezidente Bankada CNRT, Duarte Nunes hato’o pedidu ne’e relasiona ho disputa rai iha Kaitehu, Munisipiu Likisá ne’ebé sai polemika iha públiku hafoin Xanana Gusmão halo intervensaun direita ho razaun atu defende interese nasionál.

Duarte hatete, bankada CNRT apoiu pozisaun Ministru Justisa ne’ebé deklara ona atu ‘Bongkar’ mafia sira ne’ebé sai hanesan broker.

“Ha’u husu ba Prezidente Parlamentu Nasionál atu delega membru komisaun ida ka rua bele akompaña ministru atu ‘Bongkar’ to’o iha ne’ebé. Ita hakarak hatudu ema sira mafiozu ne’eba justisa atu rai ne’e bele sees husi mafia ne’e,” dehan Duarte liu husi ninia intervensaun iha plenaria PN, Segunda (16/09).

Tuir nia, disputa rai iha Kaitehu nu’udar problema ne’ebé individu halo hasoru estadu.

“Kuandu ema defende estadu mak ita dehan la di’ak, iha situasaun rua mak bele mosu, ita defende ema individu ne’e ka ita defende estadu?” dehan nia.

Bainhira Xanana ba halo intervensaun, nia dehan, Prezidente Repúblika Francisco Guterres Lú Olo intervensaun liu husi ninia mensajen ba povu katak tuir loloos labele iha intervensaun ba situasaun hanesan ne’e.

Duarte dehan, loloos Xefe Estadu mak tenke defende estadu nia interese, tanba se Xefe Estadu mak la defende ona estadu see mak atu defende tan.

“Ha’u hakarak ita deskute nafatin bainhira mak ita defende estadu no defende ema individu ka mafia nia interese, ha’u hakarak hamosu fali polemika ida ne’e atu ita rame-rame hamutuk ho Ministru Justisa ita duni tiha mafiozu sira ne’e,” nia hatete.

Iha fatin hanesan Deputadu Bankada KHUNTO, Antonio Verdial, apresia asaun Xanana iha Kaitehu.

“Ha’u hanesan eis diretor Teras no Propriedade iha VI Governu Konstitusional, ha’u suporta Komandante Kay Rala Xanana Gusmão, maibé ha’u triste bainhira ema funu-nain boot ida ba halo intervensaun iha terenu, halo asaun ne’ebé realistiku,”dehan nia.

Verdial esplika, tuir lei númeru 1/2003, artigu 17 vesiku 1 (a entidade competente que vai ejecutar esta ordem e ativacão nasional de terras propriedades e services cadas rais), maibé realidade orientasaun ne’ebé mai husi superior la halo tuir lei haruka, tanba ne’e buat sira ne’e sai baralladu hotu iha terrenu.

“Ha’u foti ezemplu iha VI governu konstitusional kuandu ami hala’o serbisu, ha’u nunka hatan Ministra Justisa Lucia Lobato, atu sama ain iha terenu bainhira terenu ne’e iha problematika nia laran, ha’u sempre marka direita iha terenu hodi komanda ofisias sira atu rezolve kestoens disputas iha parte administrativas, haree husi aspeitu ekonomia, sosial, kultura, politika, defeza no seguransa.”

Deputadu ne’e husu ba governu liu-liu Ministeriu Justisa atu halo serbisu tenke integradu no tuir lei haruka.

“La’os ita uza fali ita-nia personalidade hanesan autoridade politiku hodi marka prezensa depois halo fali deklarasaun ne’ebé tuir loloos ita la presiza ko’alia,” dehan nia.

Nia sujere mós ba PN atu halo liña koordenasaun hodi haree ba espetu sira ne’e.

Iha fatin hanesan, Deputadu husi Bankada FRETILIN, Antonino Bianco husu ba Ministru Justisa atu labele ko’alia de’it maibé tenke tau iha asaun hodi halo serbisu makas.

Entretantu, molok ne’e Ministru Justisa (MJ), Manuel Cárceres, deklara katak iha tempu badak sei sobu máfia iha justisa, tanba iha provas ne’ebé sufisiente.

Cárceres deklara asuntu ne'e relasiona ho akuzasaun ne'ebé iha no Konfesa katak, nia la'ós broker ba kompania Marino Interprise no nia la koñese.

“Ha'u prontu atu bongkar máfia se de'it no ha'u hatene máfia sira ne'e, tanba ha'u iha evidénsia, ha'u la broker ba Marino Interprise, ha'u la koñese tan, maibé, rai ne'e Marino Interprise nian no iha dokumentu husi notariadu hateten katak, iha sosa no fa'an ,”dehan nia.

Nu’udar MJ, Cárceres lakohi ba kadeia no lakohi halo moe ninia oan sira, tanba antes nia asume kargu ne'e, ninia oan sira S2 hotu kedas, no nia mai la'ós atu buka riku maibé atu servisu.

“Ha'u sei book husi Terras Propriedade no ha'u sei duni sai sira hotu, ha'u la ta'uk ema ida", MJ ko'alia ho lian maka’as.

Read 671 times
Rate this item
(0 votes)
MidAd1