Sexta, 27 Abril 2018 | Login
Ilustrasaun Polisia Militar tuir hela formasaun Ilustrasaun Polisia Militar tuir hela formasaun

Soldadu F-FDTL ne’ebé Tuir Atividade PSHT Hetan Demisaun Featured

DILI: FALINTIL Forsa Defeza Timor Leste (F-FDTL) aplika duni regra rigoruzu ba ninia membru sira. Iha Segunda (11/12) iha kampaun Metinaro, Komandante Komponente Apoiu Servisu Tanente Coronel Punufanu lidera serimonia demisaun ba ninia membru ida.

Demisaun ba soldadu Domingos Bolu Araujo husi Komponete Revartisimentu ne’e hala’o tanba soldadu Domingos paratika bosok no viola regulamentu F-FDTL inklui kontra rezolusaun númeru 5/2017 kona-ba atividade artemarsial.

Tuir kronolojia, soldadu Domingos Bolu Arauju husi komponente Revartisimentu hatama karta lisensa ba Komando F-FDTL ho razaun atu akompaña nia feen iha proseseu maternidade (partus). Domingos husu lisensa hahú husi 18 to’o 21 Setembru 2017.

“Maibé loron tolu lisensa ne’e, soladu hala’o tiha viajen ba Indonezia, Kupang hodi partisipa iha atividade pegesahan warga Persaudaraan Setia Hati Terate (PSHT). Lisensa maternity ne’e laloos no bosok,” deklara parte F-FDTL.

Hafoin remata pengesahan iha Kupang, iha 27 Setembru 2017 bainhira hala’o viazen fila fali mai Timor Leste, Polisia Militar (PM) konsege kaptura iha fronteira terestre no detein iha sela PM.

Iha 3 Outubru 2017, bazeia ba despaixu husi  Komandante daruak Komponente Apoiu Servisu (KAS) Maijor Deolindo da Costa Amaral, ofisial justisa F-FDTL halo prosesu kontra soladadu Domingos Bolu Araujo tanba viola ona prosedimentu ne’ebé mak la’o iha F-FDTL.

Iha 6 Outubru 2017, lori soldadu Domingos ba KAS hodi submete prosesu investigasaun. Husi prosesu ne’e ikus mai aprezenta rezultadu investigasaun ba Xefe Estadu Maijor Jeneral Lere Anan Timur.

Hafoin haree rezultadu ne’e, iha 21 Novembru 2017 Maijor Jeneral Lere hatun despaixu separasaun servisu hodi hapara Domingos Bolu Araujo husi ninia funsaun servisu nu’udar soldadu iha instituisaun FFDTL.

Iha serimonia demisaun ne’e, Komandante KAS Tanente Koronel Punufanu husu ba soldadu F-FDTL hothotu atu labele tuir hahalok ladi’ak ne’ebé soldadu Domingos halo.

“Militar hotu husi ofisias mai to’o iha prasas tenke halo tuir rezolusaun (bandu atividade artemarsiais) ne’ebé mak governu fó sai ona iha loron 2 Jullu 2003,” deklara Tanente Koronel Punufanu.

Demisaun ne’e hala’o ho serimonia parada militar hodi hasai boña inklui diviza, nune’e hahú loron ne’e kedas soldadu Domingos fila fali ba vida sivil.

Read 1186 times
Rate this item
(0 votes)
AdBottom1