Tersa, 02 Juñu 2020 | Login
PM Rui Araujo PM Rui Araujo

Rui Araújo Hakarak Justifika Lia-Loos iha Tribunál Featured

DILI: Kazu difamasaun entre jornál diáriu Timor Post ho lezadu Rui Maria de Araújo, la’ós lezadu mak hakarak lori ba tribunál maibé ministériu públiku nia inisiativa tanba kazu ne’e nu’udar krime públiku.

Maski nune’e, lezadu Rui Araújo rasik hakarak kazu ne’e ba tribunál hodi bele justifika lia-loos liu husi prosesu justisa.

“Tuir ha’u nia hakarak presiza esklarese iha tribunál no tanba saida maka publika notísia ida ne'ebé falsu no akuza dehan uluk ha’u asesór ha’u asina rekomendasaun ba kompañia ne’e”, tenik lezadu Rui Araújo, iha salaun ministériu saúde, Kaikoli-Dili, horisehik.

“Bainhira Tribunál husu indenizasaun, ha’u hakarak hatete, mai ha’u importante mak lia-loos ne’e tenke sai, tanba pedidu deskulpa ne'ebé halo la temi katak iha akuzasaun falsu ba ha’u. Iha ne'ebá temi de’it dehan erru faktuál”, nia hatutan.

Nia esplika, iha artigu Timor Post nia laran tomak kompañia ne’e nia naran ne'ebé nia rasik maka asina dokumentu nu’udar asesór ne’e jornalista la temi, maibé temi fali kompañia seluk nia naran.

Nune’e, lezadu dehan, jornál ne’e mós dehan Rui Araújo fó kontratu ba nia amigu sira hodi manan. Maibé tuir loloos, Konsellu Ministru maka aprova.

Ne’e duni, lezadu konsidera ne’e la’ós erru faktuál, tanba kompañia sira ne’ebé temi iha jornál ne’e sala hotu.

“Ha’u la aseita ida ne’e hanesan erru tékniku”, dehan Rui Araújo.

Nia mós esklarese katak, nu’udar lezadu la’ós nia mak lori sira jornalista no diretór Timor Post ba tribunál, maibé ministériu públiku maka lori tanba denunsia kalunioza tama iha kategoria krime públiku, ne'ebé la depende ba keixa husi lezadu,

Lezadu Rui Araújo dehan, lakohi indenizasaun maibé esklarese lia-loos iha justisa nia oin.

Karta Rui Araújo Ba Tribunál Nu’udar Lezadu

Karta ne’ebé mai husi atuál Primeiru Ministru, Rui Maria de Araújo Tribunál Distritál Dili (TDD), nu’udar lezadu, la’ós Xefe Governu. Tanba ne’e, tribunál sei tetu hodi deside bazeia ba faktu ne’ebé iha.

Juis prosesu Ivan Suritay hatete, karta ne’ebé mai Rui Maria de Araújo nu’udar lezadu, la’ós Primeiru Ministru. Tanba ne’e, tribunál bazeia ba faktu ne’ebé iha kondena ka la kondena ne’e bazeia ba faktu ne’e mai husi Ministériu Públiku (MP).

“Iha karta ne’e rasik dehan katak, labele kondena hatama jornalista ba prizaun, labele kondena pena multa ka suspensaun, maibé Tribunál Distritál sei bazeia ba faktu ne’ebé mai husi ministériu públiku (MP)”, dehan juis Ivan, horisehik.

Iha parte seluk, Diretór AJAR, José Luis Oliveira hateten, Kódigu Prosesu Penál fó posibilidade ba konsiliasaun no mós fó posibilidade ba juis sira atu foti desizaun ka atu hato’o buat ruma.

Nia dehan, prosesu hanesan ne’e la’ós prosesu foun, akontese beibeik ba kazu seluk-seluk, bainhira suspeitu ne’e sente sala iha Tribunál to’o ona desizaun bainhira lezada ka lezadu hakarak perdua arguidu deklarasaun sai konsiderasaun ba desizaun juis.

Desizaun juis ne’e ketak ida, maibé alegasaun husi ministériu públiku katak iha alegasaun hanesan ne’e mais juis la deside bazeia ba alegasaun, maibé juis mós sei tetu faktu seluk inklui faktu antenuante hakmaan ba suspeitu sira seluk inklui mós deklarasaun husi lezadu.

“Iha situasaun ne’e primeiru ministru nu’udar lezadu bainhira nia perdua ona arguidu ne’e, entaun surat ninian ne’e ita konsidera fatór ne’ebé juis sei konsidera iha nia desizaun. Juis bele tuir alegasaun ne’ebé prokuradór halo ka bele tetu deklarasaun husi lezadu bele mós deside hetan pena suspensaun,” hatete José Luis.

KI Apresia Medida husi Rui Araújo

Prezidente Konsellu Imprensa Timor-Leste (CI), Virgílio da Silva Guterres hato’o apresiasaun ba medida ne’ebé Rui Maria de Araújo foti hodi haruka karta ba Tribunál husu atu labele fó sentensa no multa ba jornalista no eis diretór jornál Timor Post.

“Ida ne’e reflete katak Rui laiha intensaun atu hatama jornalista ba prizaun, maibé iha intensaun pedagójiku katak hakarak loke oportunidade atu fó hanoin ba jornalista sira atu tau atensaun iha aprezentasaun faktu”, dehan nia, liu husi komunikadu ne’ebé diáriu ne’e simu husi KI.

Depois lezadu Rui hato’o karta ba Tribunál, Tuir Prezidente KI katak depende ba juis sira atu konsidera ka lae karta ne’ebé haruka ona ba Tribunál.

Iha parte seluk, Prezidente KI dehan, depende ba Timor Post no jornalista Oki atu haree surat ne’ebé Rui haruka ba Tribunál, atu karik iha obrigasaun ruma ne’ebé sira atu halo maka sira presiza halo apresiasaun ba nia karta.

KI hein katak tribunál deside tuir saída maka lezadu (Rui Araújo) nia pedidu hodi fó de’it sansaun pedagójiku ka edukativu balun, maibé labele lori jornalista ba kadeia.  

Read 1145 times Last modified on Kinta, 01 Juñu 2017 11:59
Rate this item
(0 votes)