Promesa Dahuluk Komando PNTL Foun iha Palasiu Prezidensial Featured

By Cristina Ximenes Abril 01, 2019 9074

DILI: Komandante Jeral Polisia Nasionál Timor Leste, Komisariu Faustino da Costa no Komandante Jeral daruak, Komisariu Mateus Fernandes, sama ain dahuluk iha Palasiu Prezidente Nicolau Lobato, Bairro-pite, hafoin simu pose.

Hanesan públiku hatene, Komisariu Fautino no Komisariu Mateus, simu pose hodi lidera PNTL ba tinan haat iha Kuarta (27/03). Prezensa Komandante PNTL na’in rua iha palasiu prezidensial ne’e atu halo enkontru dahuluk ho Xefe Estadu Francisco Guterres Lu Olo.

“Ami na’in rua loron dahuluk halo serbisu nian agradese ba Prezidente Repúblika ne’ebé marka prezensa iha ami (PNTL) nia seremónia aniversáriu no mós tomada posse,” dehan Komisariu Faustino hafoin enkontru semanál ho PR Lu Olo.

Iha enkontru ho PR Lu Olo, Faustino dehan, PR Lu Olo husu ba Komando foun ne’e atu realiza duni ninia promesa ne’ebé hato’o iha diskursu bainhira simu pose.

“Ha’u hanoin ida ne’e maka enkontru loron dalauluk nian ba ami na’in rua nia mandatu hanesan mós enkontru semanál ne’ebé halo Prezidente Repúblika,” dehan nia.

Liu tan Komisariu Faustino hatete, iha ninia lideransa nia hakarak garante katak ba oin movimentu transporte no atividade ekonomia sei lao durante oras 24 nia laran.

“Ha’u garante ida ne’e tenke halo duni tanba ita agora dadauk mós faze dezenvolve hela no hadia iha regulamentu, disiplina no mós regras empañamentu serbisu nian”.

“Mehi ida ne’ebé ami tau karik ba oin ne’e (transporte públiku) Dili laran labele halai to’o oras tuku 5:00 de’it no loza sira labele loke to’o oras tuku 05:00 de’it. Loza sira loke oras 24, taxi ho mikrolet sira halai oras 24”, dehan Komisariu Faustino.

Atu bele garante movimentu durante oras 24 nia laran, Komisariu ne’e hatete, presiza mós halo manutensaun ba Circuit Camera Television (CCTV) ne’ebé daudauk ne’e avaria hela.

“CCTV ne’e funsiona hela, iha balun, ne’ebé dala-ruma agora dadauk ne’e tanba problema ahi entaun ne’e tenke labele la’o no balun bele keima tiha, agora fila fali ba ami oinsá atu haree ninia manutensaun,” dehan Komisariu Faustino.

Koalia kona-ba manutensaun, nia dehan, ne’e koalia kona-ba osan, tan ne’e ho orsamentu ne’ebé iha PNTL sei halo manutensaun ba ekipamentu ho volume kiik.

Aleinde ne’e, Komisariu Faustino koalia mós kona-ba serbisu Ofisial Polisiamentu Suku (OPS).

“Ema barak nia preokupasaun kona-ba OPS ne’ebé ema ida de’it mak iha terenu tanba ne’e mak problema ruma iha suku laran na’in ida mesak labele atende ema barak, ne’e dezafiu ida ne’ebé presiza mós suporta, tanba ne’e mak ha’u dehan katak loos duni parte ida ne’e (presiza) suporta governu nian ba oin oinsá atu bele solusiona dezafiu sira ne’e.”

Tuir nia, durante ne’e fasilidade ba OPS minimu no OSP sira tenke halo serbisu dupla.

“Balun hanesan investigasaun iha munisipiu ka eskuadra sira maibé hanesan mós Ofisial Polísia Suku, dupla funsaun,” nia hatete.

Rate this item
(0 votes)

Independente Digital TV