Sexta, 19 Jullu 2019 | Login
Pessoal Polisia Militár Tiru Joven Ida Kanek

Pessoal Polisia Militár Tiru Joven Ida Kanek Featured

DILI: Vítima no komunidade sira iha Suku Kaikoli fó sasin katak  pesoál membru Polisia Militár tiru joven ida kanek, iha loron-Sabdu (2/02), maizumenus menus tuku 16:oo Otl.

Brutalidade pesoál PM ne’e halo komunidade iha área Kaikoli sente pániku hafoin Andre dos Santos (joven) hetan tiru.

Tuir kronolojia akontesimentu, Casmeiro da Costa Ximenes nu'udar moos vítima ida deklara katak molok atua saun pesoál PM ne’e, mosu ona kazu krime ida iha fatin refere husi suspeitu ho inisiál IC, maibé suspeitu ne’e halai no lakohi koopera ho parte seguransa, ne’e duni pesoál Polisia Militár mai buka tuir la hetan.

Tanba ne’e, pesoál Polisia Militár ne’e baku fali joven hirak ne’ebé la hatene problema.

“Ha’u la hatene problema ida ne’e, maibé hanusa pesoál Polisia Militár ne’e to’o mai baku fali ami no tiru kanek tan kolega ida. Nia mai ho roupa sivíl no lori pistola,”deklara Casmeiro ne’e ba jornalista sira hafoin hato’o keixa iha Parlamentu Nasionál.

Nu’udar mós vítima ne’ebé hetan baku husi pesoál Polisia Militár, Casmeiro hateten, sira la hatene pesoál PM ne’e nia naran, maibé sira koñese, ne’e duni sira hakarak lori prosesu tuir dalan justisa nian.

“Ami lamenta tebes ho atuasaun ida ne’e. Tan ne’e, husu ba ulun boot parte Seguransa no Defeza nian atu haree kazu ida ne’e ho sériu, se lae povu ki'ik sira sai nafatin vítima,”dehan Casmeiro.

Entretantu Deputadu Bankada Frente Revolusionáriu Timor-Leste Independente (FRETILIN), Joaquin dos Santos kondena makas atuasaun pesoál seguransa balun ne’ebé la tuir regra.

“Governu presiza tau atensaun sériu ba kestaun hirak ne’e, tanba problema hanesan ne’e sempre akontese no karik pesoál balun hala’o atuasaun fora husi regra tenke foti sansaun tuir lei ne’ebé iha,”dehan Joaquin.

Hataan ba kestaun ne’e, Ministru Reforma Lejizlativa Asuntu Parlamentár, Fidelis Mangalhães hatete, liu husi investigasaun hafoin mak bele hatene, loos ka lae akontesimentu ida ne’e.

Mezmu nune’e, parte governu sei hato’o asuntu ne’e ba Ministériu kompetente hodi tau atensaun.

Vitima hetan tiru oras ne’e hala’o taratamentu saúde iha Ospital Nasionál Guido Valadares Dili.

Read 1284 times
Rate this item
(0 votes)