Sexta, 27 Abril 2018 | Login
Fos Fos

Governu Planu Gastu Tokon $3 Sosa Foos Featured

DILI: Stock foos Governu iha armazein menus ona husi tonelada rihun rua (2.000). Ne’e duni, Ministériu Komérsiu Indústria (MKI) planu atu gasta tan orsamentu tokon $3 hodi sosa foos.

Vise-Ministru, Jacinto Barros hateten, orsamentu atu sosa tan foos ne’e depende ba Konsellu Ministru mak aprova. Maibé, planu ne’e sei diskute lai tanba durante ne’e kompañia importadór foos mós kontinua importa.

Agora daudaun importadór sira-nia foos iha sira-nia armazein hamutuk tonelada rihun tolu-resin, no governu nia foos mós sei sufisiente iha tinan ida ne’e nia laran, governu mós labele hatama barak liu tanba importadór sira mós hatama mai.

“Kada tinan ita tau orsamentu tokon $3 hodi sosa foos, maibé iha tinan ida ne’e tanba osan duodesimu ita sei haree situasaun ne’e di’ak ita iha orsamentu ne’ebé konsellu Ministru mak sei deside”, dehan Jacinto, iha nia knaar fatin, Fomentu-Bebora, horisehik.

Tuir nia, kuandu foos iha rai laran laiha liu ona mak governu sei iha kontaktu di’ak ho Xina, Tailándia, Vietname no Myanmar ne'ebé durante ne’e halo importadór foos no sira preparadu hodi hola husi sira.

Governante ne’e dehan, foos sei uza nafatin iha tinan kotuk ne’e nian 2017 ne'ebé iha tonelada rihun 100 halo tiha intervensaun merkadu baratu ba serimónia loron boot Natál no Páskua ninian.

Foin lalais komunidade balun mós afeta ba dezastre naturais nian ne'ebé akontese iha fulan kotuk no sira halo intervensaun no hasai foos kuaze besik tonelada 700.

“Foos komesa menus ona no governu mós planu atu hola, maibé ita sei uza hela osan duodesmu nune’e mak ita sei haree hela para oinsá bele hola foos hirak ne’e”, dehan nia.

Tuir Vise-Ministru, antes atu hola tan foos foun ba foos tuan sira iha armazein tenke hasai hotu depois mak foun bele tama fali.

Aleinde ne’e, kona-ba orsamentu atu sosa produtu lokál ne’e orsamentu operasionál no duodesimu nian sei natoon hela iha CLN ne’e kuaze rihun $100 resin ne’ebé atu sosa produtu lokál, liu-liu hare.

Tuir planu sosa barak liu mak iha munisípiu Bobonaru, Vikeke, Baukau, Kovalima, Ainaru, no sosa mós iha fatin seluk ne’ebé agrikultór sira halo kooperasaun ho setór privadu.

Maibé sira nia parte nafatin sosa produtu lokál tanba hare ne’ebé agrikultór sira kuda komesa menus koleta daudaun, nune’e governu buka para atu hola fila fali hodi tau iha armazein nune’e bele fa'an iha munisípiu sira ne'ebé ho folin baratu.

“Foos lokál durante ne’e ita fa'an ba komunidade kada 25kg $9.50 ida importa ne’e mak ita fa'an ba 25kg $9”, dehan nia.

Loloos ministériu ne’e atu halo intervensaun beibeik, maibé ne’e fó fali impaktu ba maluk importadór sira tanba hakarak atu dudu setór privadu sira atu la'o ba oin bainhira foos laiha ona mak governu foin atu halo intervensaun merkadu ka iha mós dezastre naturais.

Tuir nia katak, durante ne’e governu seidauk iha armazein ne’ebé di’ak iha munisípiu entaun sei konsentra de’it iha ne’e maibé iha ona planu no governu ne’e la'o loos ona no governu tuir mai tenke haree ona no desentraliza nia servisu balun ba iha munisípiu. 

Read 106 times
Rate this item
(0 votes)
AdBottom1