Kuarta, 14 Novembru 2018 | Login
Bolseirus hasai foto hamutuk ho parseiru sira Bolseirus hasai foto hamutuk ho parseiru sira

EUA, TL no Bayu-Undan Joint Ventures Ónra Bolseiru Timor oan iha Programa Interkámbiu Akadémiku Featured

DILI:Bolseiru liu 100 husi programa bolsu estudu J. William Fulbright Scholarship, the Fulbright-SERN Scholarship, the United States – Timor-Leste (USTL) Scholarship no programa sira seluk simu rekoñesimentu espesial durante eventu komemorativu ida iha Timor Plaza iha loron 12 Juñu 2018.

Embaixadora EUA, Kathleen M. Fitzpatrick partisipa hamutuk ho Prezidente Autoridade Nasional Petroleu no Mineral (ANPM) Gualdino do Carmo da Silva, ConocoPhillips Country Manager José Lobato Gonçalves, no distintu komvidadu seluk iha resepsaun ne’e.

Eventu ne’e konta ho prezensa Timor oan notavél nain hitu ne’ebé sei desloka ba Estadus Unidus iha fulan hirak oin mai ba sira nia programa bolsu estudu Fulbright, Fulbright-SERN no USTL Scholarship. Rosaria Elisabeth Aniceto Cardoso Amaral bolseiru Fulbright Scholarship, Gilsel Emanuel Morais Correia Borges, Agostinho Maia no Ernesto Pinto mak resepiente bolsu estudu Fulbright-SERN Scholarships ba tinan ida ne’e nian. 

Bolseiru USTL Scholarship 2018 nian mak Jorguino Savio, Clinton Guterres no Aderito Mambares.  Estudante sira ne’e sei halao estudu ba sira nia mestradu no baixaleratu iha universidade sira iha EUA.

Iha nia diskursu, Embaixadora Fitzpatrick subliña importansia edukasaun ba futuru Timor-Leste nian.

“Governu Estadus Unidus kontente tebes atu apoia futuru lider sira Timor-Leste nian. Imi mak sira ne’ebé sei ajuda buka solusaun ba problema no kria oportunidade foun ba Timor oan sira.”

Embaixadora mo’os informa konaba prezensa Amerikanu sira ne’ebé halao servisu iha Timor-Leste hanesan U.S. Fulbright Scholars, Public Policy Fellows, English Language Fellows and Specialists no Voluntáriu Korpu ba Paz.

“Imi mak representa duni buat diak ne’ebé Amerikanu iha hodi oferese bae ma seluk no imi nia partisipasaun iha programa sira ne’e ajuda demonstra valor interkambiu akadémiku no kultural.”   

 

Bolseiru Fulbright-SERN Justina Belo, Bonaventura Bali, and Andre A. Nono ne’ebé mak foin fila husi Estadus Unidus ho sira nia mestradu inklui ona iha alumni liu 600 husi programa interkámbiu ne’ebé finansia husi governu EUA iha Timor-Leste.

Embaixada Estadus Unidus no nia parseiru sira sei kontinua haluan partisipasaun Timor oan sira nian iha programa sira ne’e, hanesan dalan efetivu ida atu hametin releasaun bilateral no ajuda hadiak siguransa no kresimentu ekonómiku iha Timor-Leste.

Biro ba Asuntu Edukasaun no Kultural, Ministériu Negosiu Estranjeiru EUA nian mak sai patrosinador ba programa Fulbright Foreign Student no USTL Scholarship Program no Bayu-Undan Joint Ventures mak oferese apoiu adisional ba programa Fulbright-SERN Graduate Scholarship. 

ANPM lori governu Timor-Leste nia naran apresia esforsu no kolaborasaun atu kontinua oferese bolsu estudu ba Timor oan notavél sira ho programa prestijiu Fulbright-SERN ne’ebé tama ona ba tinan ha’at iha 2018.

“Ami hato’o obrigadu ba Governu Estadus Unidus, ConocoPhillips no Bayu-Undan Joint Ventures ba imi nia devosaun hodi oferese bolsu estudu Fulbright-SERN ba Timoroan nain tolu ohin.”

Hateten Prezidente ANMP Gualdino do Carmo da Silva iha nia diskursu. “Ami fiar katak ida ne’e oportunidade diak tebes ida ba Timor oan selesionadu sira hodi bele konkista estudu importante iha area petroleum no gas iha Estadus Unidus hodi kontinua kontribui ba dezenvolvimentu Timor-Leste nian.”

Ho kooperasaun ne’ebé lao dau-dauk entre parseiru relevante sira sei produz Timor oan qualifikadu barak ne’ebé sei servisu iha area enerjia no area relasionadu sira iha tinan hirak oin mai.

Read 344 times
Rate this item
(0 votes)

About Author