“Ita nia limitasaun mak ne’e, la’ós de’it tanba harís fatin la iha, harís fatin iha de’it mós ita ba estraga, ita hare iha Lesidere ne’ebá Hariis fatin a’at hotu ona, ita nia realidade mak ne’e,” dehan PM Rui ba jornalista sira iha Palásiu Governu, Sesta (17/02).
Nia dehan, governu iha responsabilidade atu prepara maibé komunidade iha responsabilidade bo’ot atu labele estraga.
Tanba ne’e Xefe Governu husu ba qualquer sidadun atu kontribui liu husi servisu hamutuk ba dezenvolvimentu seitór hotu.
Iha fatin seluk, Prezidente Camara Comersiu Insdutria Timor-Leste (CCITL), Oscar Lima konsidera dezenvolvimentu area turizmu importante tebes tanba bele dada turista sira bele mai hodi husik osan ruma ba Timór.
Nia husu governu atu hadia infra-estrutura hanesan estrada ba munisípi ne’ebé oras ne’e komesa bo’ok ona no hein katak loron ida estrada refere sei remata.
“Ita husu ba governu tenke tau atensaun makas ba Aeroportu Internasionál Nicolau Lobato, tanba ne’e hanesan odamatan ne’ebé presiza hadia, hodi nune’e bele atrai liu tan turista sira atu mai Timor-Leste”, dehan Oscar.
Oscar mos koalia kona ba Portu Dili katak, sira ko’alia beibeik ona. Tanba CCI-TL koalia ho Ministériu kompetente atu halo atendimentu di’ak ba emprezáriu sira ne’ebé importa sasan husi liur.
