AJTL Kapasita Jornalista Prepara Kobertura Ba Eleisaun Boot Rua

By Artur da Luz Janeiru 26, 2017 1767

DILI: Asosiasaun Jornalista Timor Leste (AJTL) hahú prepara ona jornalista Timoroan sira hodi tuir formasaun para bele halo kobertura ba eleisaun boot rua, Prezidensiál no Parlamentár iha tinan ne’e.

Formasaun ne’e hala’o liu hosi workshop ho tema: “Dezafiu Kobertura ba Eleisaun Jerál”

Sekretáriu Estadu Komunikasaun Sosiál, Nelio Isac Sarmento dehan, formasaun ne’e importante ba jornalista no asosiasaun média hodi nune’e hasa’e kapasidade ba jornalista oinsá maka halo kobertura ba eleisaun prezidensiál no parlamentár ho profisionalizmu no independente.

“Ita sei elabora dekretu lei ida oinsá maka halo regulariza kona-ba partisipasaun bainhira prosesu kampaña no eleisaun ne’ebé maka besik ona,”dehan Nelio bainhira loke abertura workshop iha salaun Luz Clarita Dili, Kuarta (25/1)

Haree ba pasadu, Nelio dehan, dala barak kandidatu no militante sira barak maka lamenta ho notísia hirak ne’ebé jornalista hakerek no públika ona, faktus hirak ne’e maka jornalista sira sempre hetan tortura hosi militante no simpatizante sira. 

Eis jornalista TVTL dehan, Prezidente Repúblika promulga lei eleisaun jerál sei akontese iha 20 Marsu no média balun sei iha limitasaun ba jornalista atu ba hala’o kobertura iha kandidatura prezidente hirak ne’e. 

Susesu ne’ebé média tenke halo maka atu halo informasaun kona-ba kampaña polítika kandidatu idak-idak ba povu hodi publika informasaun ho loloos, balansu ba leitores ka lee na'in sira atu konsumu informasaun ho independente, la inkilina ba grupu, ka partidu polítiku sira

Iha fatin hanesan, Komisáriu Konsellu Imprensa (KKI), Hugo Fernandes dehan, workshop ida ne’e importante oinsá maka fahe esperiénsia ba jornalista sira bainhira hala’o kobertura ba eleisaun jerál ho professional.

Hugo dehan, presiza iha formasaun adekuadu ba jornalista sira bainhira prosesu eleisaun kuandu akontese tanba informasaun importante ba públiku. 

Komisáriu ne’e haktuir, haree ba pasadu, dala barak jornalista sira barak maka sai vítima bainhira halo kobertura ba kampaña. 

Iha okaziaun ne’e Komisáriu ne’e mós rekomenda ba CNE ho STAE atu halo formasaun adekuadu ba jornalista sira bainhira prosesu kampaña ne’e hahú. Atu nune’e notísia ne’ebé maka instituisaun média balun hatún tenke ho kualidade. 

Entretantu, Prezidente AJTL, David Hugo dehan, sira organiza workshop ne’e atu aumenta rekursu jornalista Timoroan sira bele preparadu, molok ba kobertura iha eleisaun.

Workshop ne’e sei hala’o durante loron rua ne’ebé maka ho oradór sira mai husi SEAPA no entidates sira ne’ebé maka kaer pasta iha instituisaun governu nian.

Rate this item
(0 votes)

Independente Digital TV