Sasin Labarik Feto: Kalan Ida Selu $1.000 no Motor Featured

By Abril 27, 2017 7469
Prostituta Prostituta

ODAMATAN kuartu otel tarutu. Ema na’in rua ne’ebé bolu malu ‘astuka’ tama ba laran. Leno sai moos loos husi sira-nia oin sentimentu kontente haree labarik feto helik iha sikun kuartu ho sentimentu ta’uk.

Durante kalan tolu (3) ona, Rina (la’os naran loos) hela iha kuartu otel iha area Grecenfor (Grilhos, Central no Formosa) hodi hein astuka (katuas/kaben-na’in) ‘nakar’ sira ne’ebé hakarak selu karun hodi toba hamutuk ho nia.

Iha loron tolu liu ba, Rina sei sai hanesan labarik feto didi’ak. Nia laiha hanoin atu komete ho atividade seksual. Maibé, buat hotu nakfilak bainhira labarik ho idade tinan 15 ne’e hasoru-malu ho ema na’in rua, Ajano (la’os naran loos) ho Marta (la’os naran loos).

Iha 16 Fevereiru 2015 maizumenus tuku 5 loraik, Rina ne’ebé foin fila husi eskola hasoru-malu ho Marta no Ajano iha area Matadoru.

Sira hakbesik an ba Rina no hahú dada-lia. La kleur, Ajano telefone ba nia maluk balun hodi lori kareta Pajero mean ida mai. Marta ho Ajano husu mós ba Rina ne’ebé monu ona ba sira-nia gaiola atu tuir sira ho Pajero mean ne’e ba iha otel ida iha area Grecenfor.

Bainhira to’o iha Otel, Marta ho Ajano lori Rina ba kuartu ida. Iha ne’eba, Rina hasoru ho feto klosan na’in lima seluk ne’ebé ho situasaun la diferente dook husi Rina. Iha kalan ne’e, Rina ho feto na’in lima seluk akompaña husi Marta toba iha kuartu ida.

Iha loron tuir mai, Marta no Ajano hahú hala’o kontaktu ho ema ne’ebé hakarak selu ho folin karun atu mai toba hamutuk ho Rina. Folin ne’ebé Marta ho Ajano fó mak $1.000,00 ho motor ida.

“Sira telefone ho kodigu astuka,” dehan Rina.  

Hafoin hetan ema, Marta ho Ajano mai hasoru Rina hodi husu ba Rina atu atende ema ne’e no promete katak Rina mós sei hetan osan boot.

“Sira haruka ema mai husu ha’u atu toba hamutuk, maibé ha’u lakohi tanba tauk familia no haree mane sira ne’e mesak katuas de’it,” Rina konta.

Hafoin akontesimentu ne’e, Rina hato’o keixa ba Polisia no ninia kazu iha hela prosesu julgamentu iha Tribunal Distrital Dili (TDD).

Marta no Ajano ne’ebé sai arguidu ba kazu explorasaun seksual hasoru Rina konfesa katak atividade ne’e sira halo kleur ona.

Arguidu sira dehan, durante ne’e sira buka feto klosan hodi ‘fa’an’ ba katuas sira no sira hetan osan husi atividade ne’e.

Marta dehan, bainhira mane ida halo relasaun seksual ho feto sira ne’ebé sira prepara tenke selu $50,00 to’o $100,00. Se toba hamutuk durante kalan ida tomak selu $150,00.

Ba Rina, Marta dehan sira husu $1.000,00 no motor ida tanba Rina sei virjen.

Iha Segunda (24/04), TDD marka atu halo julgamentu ba kazu Krime Explorasaun Seksual hasoru Rina, maibé prosesu julgamentu ne’e adia ba 23 Maiu 2017 tuku 2:00 Otl ho razaun Rina nia tinan sei kiik no presiza hetan akompañamentu husi inan-aman iha prosesu julgamentu.

“Bainhira Tribunál atu halo julgamentu ba ema tenke haree ba ema-nia tinan, nia tinan to’o atu tuir julgamentu ka lae. Se arguidu ka lezadu ida mak idade sei ki’ik ne’e inan-aman sira tenke akompaña sira,” informa Juiz Prosesu, Ivan Suriati.

Ministériu Públiku akuza arguidu sira hanesan co-autór ba krime fa’an ema tuir artigu 166 kodigu penal Timor-Leste. Iha artigu ne’e hatete “See mak iha situasaun ne’ebé la tama iha artigu 136 nia previzaun, ho aktu ka tranzasaun naran ida, transfere ema ka ema gropu ida ba ema ka ema gropu seluk hodi simu hanesan pagamentu kuantia ruma ka kontrapartida, rekompesa ka vantajen seluk, sei hetan pena prizaun tinan 2 to’o tinan 8”.

Rate this item
(4 votes)

Independente Digital TV